Top.Mail.Ru

«Щынэгъончъэным ибгырыпх»

Джа цIэр зиIэ пэшIорыгъэшъ Iофтхьабзэ Адыгеим икъэралыгъо авто­­инспекторхэм зэхащагъ. Щынэгъончъэным ибгырыпх ыкIи хэу­шъ­хьа­фыкIыгъэ тIысыпIэхэр икъу фэдизэу водительхэм замы­гъэ­фе­дэ­хэкIэ тхьамыкIагъоу къыхэкIыхэрэр агу къагъэкIыжьыгъэх. Гъогу-патруль къулыкъум ихэушъхьафыкIыгъэ батальон иинспекторхэр водительхэми, ахэм къадисхэми ящынэгъончъагъэ пхъашэу лъэплъэх, зыныбжь имыкъугъэхэр зэрэзэращэхэрэм анаIэ тырагъэты.

Гъогу полицейскэхэм япшъэ­рылъ шъхьаIэр — гъогу транспорт фыкъоныгъэхэр дэгъэзы­жьыгъэнхэр, гъогум щызэфыряIэ зэфыщытыкIэм хэгъэхъогъэныр, гъогурыкIоным хэла­жьэхэрэм ящынэгъончъагъэ зыкъегъэIэтыгъэныр.

Мыхэм афэдэ пэшIорыгъэшъ Iофтхьабзэхэм яшIуагъэкIэ цIыфхэр хъугъэ-шIагъэхэм зэрахафэхэрэр ыкIи фыкъоны­гъэхэу ахахыхэрэр нахь макIэ ашIынхэм инспекторхэр щэгугъых.

ПIатIыкъо Ичрам. Гъогу-патруль къулыкъум ихэушъхьафыкIыгъэ батальон иротэу n 1-м икомандир.