Адыгабзэм, лъэпкъым итарихъ язэгъэшIэн, шэн-хабзэхэр къэухъумэгъэнхэм афэгъэхьыгъэ концерт республикэм и Къэралыгъо филармоние щыкIуагъ.

Гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм ипащэу, философие шIэныгъэхэмкIэ докторэу ЛIыIужъу Адамэ иусэу «Тэ тыадыг» зыфиIорэм техыгъэ орэдыр зэхахьэм лъапсэ фэхъугъэу плъытэ хъущт. Къэралыгъо филармонием иэстрадэ купэу «Ошъутенэм» ихудожественнэ пащэу, Адыгэ Республикэм искусствэхэмкIэ изаслуженнэ IофышIэшхоу ХьакIэко Алый Iоф­тхьабзэр щыIэныгъэм щыпхырыщыгъэным бэшIагъэу пылъыгъ. ЗэкIэ имурадхэр къыдэхъугъэхэу ылъытэрэп, егъэжьапIэу ашIы­гъэр лъыгъэкIотэгъэныр пшъэрылъ шъхьаIэхэм ахелъытэ.

ШIулъэгъу, сэмэркъэу орэдхэмкIэ концертыр къызэIуахыгъ. «ЩырытIымым» ыуж Лащынэ фэгъэ­хьыгъэ орэдыр залым щыIугъ. «Адыифыр» Юрий Конжиным къыхидзагъ. Театрализованнэ шIыкIэхэр агъэфедэхэзэ къаIогъэ­хэ орэдхэр щыIэныгъэм дештэх.

«СихьакIэр» Хьазэщыкъо Мосэ къыхидзи, Жарэкъо Руслъан орэдыр зэрэлъигъэкIотэгъэ шIыкIэми шэн-хабзэхэм уарегъэгупшысэ.

ПIатIэкъо Маринэ, Мамхыгъэ Маринэ, Даутэ Сусанэ ижъырэ орэдхэр къызэдаIуагъэх. Уиорэд искусствэм къыщыбгъотыныр, цIыфхэм IупкIэу алъыбгъэ­Iэсыныр зымыуасэ щыIэп. Адыгэ Респуб­ликэм изаслуженнэ артисткэу Даутэ Сусанэ «Гощэгъэгъым игъыбзэ» къызэриIогъэ шIыкIэм уегъэгушхо. Макъэр лъагэу еIэты, нэгъэупIэпIэгъум къыкIоцI зызэблехъу, гъыбзэм хэлъ гупшысэхэр къызэпкъырехых. КIэсэным зырапхыгъэм къыщыублагъэу гумэкIэу зэпичыхэрэр къыплъегъэIэсых. Жъыум фэгъэзагъэхэ­- ри орэдым икъэIон зэрэхэла­жьэ­хэрэр шIушIагъэкIэ афэолъэгъу.

Мэмэт фэгъэхьыгъэ орэдыр сценэшхом бэрэ щызэхэтэхы. ХьакIэко Алый оркестрэм хэтыгъэми, орэдхэр къыIуагъэх. Адыгэ Республикэм изаслуженнэ артистэу Хъут Рустам нахьыбэмэ зэрашIэрэр орэдыIоу зэрэщытыр ары. Пчыхьэзэхахьэм ар пщы­наоу хэлэжьагъ.

ОелI Адамэ адыгабзэкIи, урысыбзэкIи концертыр зэрищагъ. Тиадыгабзэ зэхэугуфыкIыгъэу сценэм зэрэщигъэфедагъэр зэхахьэм къыщылъэгъуагъ. КъэшъуакIохэм «Ислъамыер» къагъэлъэгъуагъ. ОрэдыIохэр пчэгум къызэрэщышъуагъэхэм къеушы­хьаты лъэпкъ искусствэр баеу зэрэщытыр.

«Тыгу илъыр къабзэмэ, тэ тыадыг» — къыщеIо орэдым. БлэкIыгъэр дэгъоу пшIэ зыхъукIэ, щыIэныгъэр нахьышIоу къызэрэбгурыIощтыр пчыхьэзэхахьэм къыхэщыгъ.

Филармонием ипащэу Къулэ Мыхьамэт, Адыгэ Республикэм культурэмкIэ иминистрэу Аулъэ Юрэ, министерствэм иотдел ипащэу Шэуджэн Бэлэ, республикэм и Камернэ музыкальнэ театрэу А. Хьанэхъум ыцIэ зыхьырэм ихудожественнэ пащэу Сулейманов Юныс, симфоническэ оркестрэм идирижерэу Аркадий Хуснияровыр, культурэм иIофышIэхэр, ветеранхэр «Ошъутенэм» фэгушIуагъэх, иIофшIагъэ лъигъэкIотэнэу фаIуагъ.

Пчыхьэзэхахьэм щыкIагъэ хэтымылъэгъуагъэу щытэп. Оркестрэм къыригъэIорэ орэдышъор лъэгащэу Iэтыгъэу къыхэкIы, орэдыIохэм ягущыIэхэр зэхэшIыкIыгъуаеу къыхэкIы. Арэу щытми, «Ошъутенэм» ригъэжьэгъэ Iофым зиушъомбгъунэу тэгугъэ. Къуа­джэхэм концертхэр къащитыхэзэ, адыгабзэм изэгъэшIэн хэхъоныгъэхэр фишIынхэу фэтэIо.

Сурэтхэр зэхахьэм къыщытетхыгъэх.