ЯтIонэрэ еджэгъумкIэ зыхэплъэщтхэр
2020-рэ илъэс бюджетым ыкIи 2021 — 2022-рэ илъэсхэмкIэ агъэнэфагъэхэм афэгъэхьыгъэ хэбзэгъэуцугъэм ипроект Парламентым зэхэсыгъоу блэкIыгъэ мазэм иIагъэм апэрэ еджэгъумкIэ щаштагъ. Джы ащ гъэтэрэзыжьынэу фашIыщтхэр ары зыфэгъэхьыгъагъэр бюджет-финанс, хэбзэIахь ыкIи экономикэ политикэмкIэ, предпринимательствэмкIэ ыкIи IэкIыб зэпхыныгъэхэмкIэ Комитетым тыгъуасэ зэхэсыгъоу иIагъэр. Ащ ипащэу Iэщэ Мухьамэд ар зэрищагъ.
Бюджетым фэгъэхьыгъэ законым ипроект тегущыIэнхэу къыхэзылъхьагъэр АР-м и ЛIышъхьэу КъумпIыл Мурат, апэрэ еджэгъумкIэ аштагъэм джыри къыфагъэзэжьынэу икIэрыкIэу къыхэзылъхьажьыгъэри ары.
АР-м финансхэмкIэ иминистрэу Долэ Долэтбый къызэриIуагъэмкIэ, федеральнэ бюджетым къыхэхыгъэу сомэ миллиардрэ миллион 297-м ехъу республикэм къыфэкIощт. Ащ фэшI а пчъагъэр республикэ бюджетым хэлъытэгъэным фэгъэхьыгъэ гъэтэрэзыжьын фэшIыгъэн фае. Ар къызэрэхахъорэм ыпкъ къикIэу нэмыкI пчъагъэу бюджетым щыгъэнэфагъэхэми зэхъокIыныгъэхэр афашIынхэ фаеу мэхъу.
АР-м иминистрэхэм я Кабинет иIэпэчIэгъэнэ фонд сомэ миллиони 100-у къихьащт 2020-рэ илъэс бюджетым изаконопроект щыгъэнэфэгъагъ. Федеральнэ гупчэм дотациеу къытIупщыщтым къыхэхыгъэу ащ джыри сомэ миллиони 150-рэ хагъэхъонышъ, сомэ миллион 250-рэ ашIыщт. Джащ фэдэу дотацием къыхэхыгъэу сомэ миллион 78-рэ мин 365-м ехъу бюджетым епхыгъэу Iоф зышIэхэрэм ялэжьапкIэ къэIэтыгъэным пэIуагъэхьанэу къыдыхалъытэщт.
Мыхэм афэгъэхьыгъэхэ гъэтэрэзыжьынхэр фэшIыгъэнхэм депутатхэр тегущыIагъэх. АР-м и Гъогу фонд джыри сомэ миллион 261-м ехъукIэ нахьыбэ шIыгъэным фэгъэхьыгъагъ гъэтэрэзыжьынхэм ащыщ. А ахъщэм щыщэу сомэ миллиони 115-р автомобиль гъогоу зэкIэми зэдагъэфедэхэрэм ягъэцэкIэжьын пэIуагъэхьанэу псэупIэ койхэм атырагощэщт. ГущыIэм пае, Инэм къэлэ псэупIэ коим сомэ миллион 35-р фэкIощт, Адыгэкъалэ сомэ миллион 30 фатIупщыщт, къалэу Мыекъуапэ игъогухэм ягъэцэкIэжьын пае сомэ миллион 50-р ратыщт.
Республикэ бюджетым фэгъэхьыгъэ законопроектым щыгъэнэфагъэхэр шапхъэхэм адиштэнхэм фэшI нэмыкI гъэтэрэзыжьынхэри проектым фашIыгъэх.
Гъэтэрэзыжьынхэр 19 хъущтыгъэх, зэкIэми депутатхэр ахэплъагъэх, атегущыIагъэх, ау зыдырамыгъэштагъэхэри къахэкIыгъэх. Зыдырагъэштагъэхэр къыкIэлыкIорэ зэхэсыгъоу Парламентым иIэщтым ятIонэрэ еджэгъумкIэ ахэплъэнхэу къыхалъхьащтых.
ШIокI зимыIэ медицинэ страхованиемкIэ АР-м и ЧIыпIэ фонд 2020-рэ илъэсымкIэ ибюджет зыфэдэщтым ыкIи 2021 — 2022-рэ илъэсхэмкIэ агъэнэфагъэхэм афэгъэхьыгъэ законопроектыми мы зэхэсыгъом щытегущыIагъэх. Ащ зыпари гъэтэрэзыжьын фашIыгъэп.
ХЪУТ Нэфсэт.