Тыгъэгъазэм иапэрэ мафэ зичэзыу фестивалэу «Адыгеир: къушъхьэ тхъагъохэр» зыфиIорэр зэхащэщт. Ар ятIонэрэу къалэу Краснодар щыIэ щэпIэ-зыгъэпсэфыпIэ зэхэтэу «СБС Мегамолл» зыфиIорэм щыкIощт.

Фестивалыр зэхэзыщэрэ компанием ыцIэри «Адыгеир: къушъхьэ тхъагъохэр», ащ IэпыIэгъу фэхъущт Адыгэ Республикэм зекIонымрэ зыгъэпсэфыпIэхэмрэкIэ и Комитет. Ахэм цIыфыбэ зыщызэблэкIырэ щэпIэ иным фестивалыр щырагъэкIокIыщт Адыгеим ичIыпIэ гъэшIэгъонхэм, лъэпкъ культурэм ибаиныгъэ, ичIыопс хьалэмэт нахьыбэу нэIуасэ фэшIыгъэнхэм пае.

НэмыкIэу къэпIощтмэ, Iофтхьабзэу зэхащэрэр къэгъэлъэгъон мэфэкI хъущт. Программэу агъэхьазырыгъэм хэхьэх къашъохэр, орэдхэр, кIэлэцIыкIу спектаклэхэр. Лъэпкъ шъуашэм диштэу IэкIэ ашIыгъэ пкъыгъохэр ермэлыкъым щащэщтых. ХьакIэщхэм, зыгъэпсэфыпIэ чIыпIэхэм цIыфхэм зыщагъэпсэфыщт, зекIон хъызмэтым фэгъэхьыгъэ лъэтегъэуцохэм арагъэплъыщтых. ЗэхэщакIохэм къызэраIорэмкIэ, концертэу къагъэлъэгъощтым профессиональнэ къэшъокIо купхэм къа­шIырэ анахь номер дэгъухэр хэтыщтых. ХьакIэхэр лъэпкъ шхыныгъохэм ахагъэIэщтых, зэнэкъокъухэр, лъэпкъ джэгукIэхэр афызэхащэщтых. Лъэпкъ прикладной искусствэмкIэ IэпэIасэхэм ашIыгъэ пкъыгъо­хэр арагъэлъэгъущтых, фаехэм ахэр ащэфынхэ алъэкIыщт.

Фестивалыр зыфытегъэпсыхьагъэр Адыгеим ибаиныгъэ цIыфыбэмэ арагъэшIэныр, чIыпIэ къэбзэ дахэхэр арагъэлъэ­гъунхэр, зыгъэпсэфакIо къытфакIохэрэр зэрэкIэмыгъожьыщтхэр агурагъэIоныр ары.