Бгъэфедэ мыхъунэу алъытэ

Тэхъутэмыкъое районымкIэ къуаджэу Пэткэу (Новая Адыгея) дэт гурыт еджапIэу N 27-м ипащэхэм унашъо ашIыгъ Вацапым хэхьэрэ класснэ купхэр ащ къыхэкIынхэшъ, «Дневник. ру» зыфиIорэм хэхьанхэу. Непэ ащ яшъыпкъэу соцсетьхэм ащытегущыIэх.

А унашъоу шэкIогъум и 20-м еджапIэм ыштагъэмкIэ классхэм япащэхэр ны-тыхэм якупхэу Вацапым хэтхэм ахэлэжьэнхэ фитхэп ыкIи ны-тыхэм ячатхэр «Дневник. ру» зыфиIорэм къы­щызэIуахынхэ фае.

Мы IофымкIэ ны-ты­хэм яшIошIхэр зэте­фыгъэхэ хъугъэ. Зыхэм еджа­пIэм ипащэхэм ащ фэдэ фитыныгъэ ямыIэу ыкIи ны-тыхэр зыхэхьащтхэм ежьхэр фитхэу аIо. НэмыкIхэм а уна­шъом дырагъаштэ ыкIи егъэджэным, IофшIэным ехьылIэгъэ къэбархэр «Дневник. ру» зыфиIорэ сайтым итынхэ фаеу алъытэ.

Тэхъутэмыкъое район администрацием гъэсэныгъэмкIэ и ГъэIорышIапIэ ипащэу Къэрэтэбэнэ Мыхьамодэ къызэриIо­рэмкIэ, унашъор зыфэгъэ­хьыгъэр IофшIэным, Iоф­шIапIэм япхыгъэу зы­те­гущыIэхэрэ къэбархэр ары. Вацапыр официальнэ къэбарым икъэкIуапIэ хъун ылъэкIыщтэп. Ащ фэдэ къэбархэм апае, гущыIэм пае, ны-тыхэм якIалэ зэреджэрэм зыщылъыплъэхэрэр, кIэлэ­егъаджэм зыщыдэгущы­Iэхэрэр «Дневник. ру». зыфиIорэр арэу щытын фае.

Къэрэтэбанэм къызэриIорэмкIэ, кIэлэегъаджэ­хэр шъхьафитэу Вацапым щыгущыIэнхэ алъэкIыщт, ахэм зыпари пэрыохъу афэхъурэп, ау официальнэ къэбар ны-тыхэм араIо зыхъукIэ, ахэм пшъэдэкIыжь ахьы.

Адыгабзэр куоу ащызэрагъэшIэщт

Адыгабзэр къэухъумэгъэным, ащ хэхъоныгъэ егъэшIыгъэным ыкIи егъэджэн Iофыр тэрэзэу зэхэщэгъэным афэлэжьэрэ Проектнэ офисым зэхищэрэ Iофтхьабзэхэм ащыщ пи­лотнэ еджа­пIэхэу адыгабзэр нахь куоу зыщы­зэрагъэ­шIэщт­хэм якъызэIухын.

АР-м гъэсэныгъэмрэ шIэныгъэм­­рэкIэ и Мини­с­терствэ зэ­кIэмкIи пилотнэ еджэпIи 4 къыхи­хыгъ:

Адыгэ республикэ гимназиер, Мые­къопэ гимназиеу N 5-р, Мыекъопэ гурыт еджапIэу N 2-р ыкIи Мые­къопэ гурыт еджа­пIэу N 7-р.

Непэ Мыекъуапэ иеджапIэхэм зэкIэми программэхэу «Адыгабзэр къэралыгъуабзэу» ыкIи «Адыгэ литературэр урысыбзэкIэ» зыфиIохэрэмкIэ ащеджэх. ЕджэпIи 4-у ахэм къахахыгъэхэм яублэпIэ классхэм адыгабзэр нахь куоу ащызэрагъэшIэщт, адыгабзэкIэ литературэри акIущт.

Пилотнэ еджапIэ пэпчъ ны-тыхэм апае зэIукIэхэр аща­шIыгъэх, ахэр бзэшIэныгъэ­лэжьхэм аIуагъэкIагъэх.

Министерствэм къызэрэща­Iуа­гъэмкIэ, еджапIэу къыха­хыгъэ пэпчъ иматериальнэ- техническэ базэ хэхъоныгъэ егъэшIыгъэным пае сомэ миллион зырыз фатIущыгъ. Ахъщэр адыгабзэр нахь куоу зэгъэшIэгъэнымкIэ еджапIэхэм ящыкIэгъэщт пкъыгъохэр ащэфыгъэх.

Анахь егъэджэкIо дэгъур

ШэкIогъу мазэм Адыгеим ис­кус­ствэм икIэлэцIыкIу еджапIэхэм ащезыгъаджэхэрэм яя VI-рэ рес­публикэ зэнэкъокъу щыкIуагъ.

Ащ икIэуххэр мы мафэхэм зэ­фа­хьысыжьыгъэх.

Апэрэ чIыпIэр зэнэкъокъум щиубытыгъ Тэхъутэмыкъое районымкIэ искусствэхэм якIэлэцIыкIу еджапIэу поселкэу Инэм дэтым икIэлэегъаджэу Наталья Мартыненкэм.

Зэнэкъокъур къэралыгъо программэу «Культурэм ихэхъоныгъ» зыфиIоу 2014 — 2020-рэ илъэсхэм ателъытагъэм хэтэу зэхащэгъагъ.

КIэух уцугъом нэбгыри 5 хэлэжьагъ: селоу Красногвардейскэм дэт кIэлэцIыкIу еджапIэм къикIыгъэу Л.Н. Силаевар, республикэ кIэлэ­цIыкIу еджапIэу N 1-м икIэлэегъаджэу Е. А. Фоменкэр, поселкэу Яблоновскэм дэт еджапIэм къикIыгъэу Н.Е. Майисевар. Тульскэм дэт кIэлэцIыкIу еджапIэм икIэлэегъаджэу О.Ю. Юркинар ыкIи Инэм дэт еджапIэм щезыгъэджэхэрэ Н.А. Мартыненкэр.

Мы мафэхэм республикэ зэнэкъокъум икIэуххэр зэфахьысыжьыгъэх. ЫпшъэкIэ къызэрэщытIуагъэу, Наталья Мартыненкэм апэрэ чIыпIэр ыубытыгъ, ащ къыкIэлъыкIогъэ нэбгыри 3-р зэнэкъокъум илауреат хъугъэх.

Зыгъэхьазырыгъэр Сихъу Гощнагъу.