КIэлэеджакIохэр рагъэблэгъагъэх

УФ-м ПенсиехэмкIэ ифонд Мыекъопэ районымкIэ и ГъэIорышIапIэ пенсиехэмкIэ системэм къыщыдэлъытэгъэ хэбзэгъэуцугъэхэм ныбжьыкIэхэр ащыгъэгъозэгъэнхэм чанэу дэлажьэ.
Джырэблагъэ поселкэу Тульскэм игурыт еджапIэу N 1-м ия 9 — 11-рэ классхэм якIэлэеджакIохэр рагъэблэгъагъэх.
ЗэкIэмкIи нэбгырэ 30 ахэр хъущтыгъэх. ГъэIорышIапIэм ипащэу ЛIыхъурэе Александр ахэм аIукIагъ, пенсиеу ыкIи социальнэ тын зэфэшъхьафэу фондым ытыхэрэр зыфэдэхэр, шапхъэу апылъхэр къафиIотагъ. Пенсием игъэпсынкIэ сэнэхьатэу къыхэпхыщтым, IофшIэпIэ чIыпIэу узIухьащтым ыкIи лэжьапкIэу къыуатыщтым мэхьэнэ ин зэряIэм ащ къыщыкIигъэтхъыгъ.
Нэужым ГъэIорышIапIэм ипащэ игуадзэу Галина Раенкэм кIэлэеджакIохэр къырищэкIыгъэх, отделхэм Iофэу агъэцакIэрэр къафиIотагъ. Электроннэ шIыкIэм тетэу ПенсиехэмкIэ фондым ифэIо-фашIэхэр къызэрэзыIэкIэбгъэхьан плъэкIыщтым фэгъэхьыгъэ егъэджэн уроки къафатыгъ.