Псэкъупсэ щыIагъэх
ПенсиехэмкIэ фондым АдыгэкъалэкIэ иотдел ипащэу Мыгу Адам джырэблагъэ поселкэу Псэкъупсэ щыIагъ, ащ щыпсэухэрэр ригъэблэгъагъэх. Пенсиехэм ягъэпсын ыкIи ятын фэгъэзэгъэ купым ипащэу ЛIыхьэтыкъо Разыети ащ хэлэжьагъ.
СтрахованиемкIэ пенсиехэм ягъэпсын, фэгъэкIотэнэу щыIэхэр, къоджэ псэупIэхэм адэсхэм япенсиехэм къахэхъуагъэр ары нахьыбэу цIыфхэр къызкIэупчIагъэхэр. Ипсауныгъэ изытет ыпкъ къикIэу IофшIапIэ Iутын амал зимыIэм лъыплъэрэм ахъщэ тынэу къыфакIорэм игъэпсын, ны мылъкум къыщыдэлъытэгъэ ахъщэр зыпэIубгъэхьан плъэкIыщтым агъэгумэкIыхэрэри къахэкIыгъэх.
ЗэкIэ къекIолIагъэхэм яупчIэхэм яджэуап агъотыгъ, зыщищыкIагъэм IэпыIэгъу афэхъугъэх. ПенсиехэмкIэ фондым ифэIо-фашIэхэр электроннэ шIыкIэм тетэу къызIэкIэбгъэхьан амал зэрэщыIэр, ар зэрэпшIыщтыр къафаIотагъ, арагъэлъэгъугъ.
УФ-м ПенсиехэмкIэ ифонд и Къутамэу АР-м щыIэм ипресс-къулыкъу