2019-рэ илъэсым шэкIогъум и 25-м къыщыублагъэу тыгъэгъазэм и 20-м нэс «Лъэпкъ шIыкIэм диштэрэ илъэсыкIэ джэгуалъэхэр» зы­фиIо­рэм ия 2-рэ шъолъыр зэнэкъокъу кIощт.

АР-м культурэмкIэ и Министерствэ яIэпыIэгъоу ащ кIэщакIо фэхъугъ АР-м лъэпкъ IэшIагъэхэмкIэ IэпэIасэхэм я Ассоциацие.

Зэнэкъокъум хэлэжьэнхэу къырагъэблагъэх республикэм имуниципальнэ гъэсэныгъэ учреждениехэм ащеджэхэрэр, лъэпкъ IэшIагъэхэм апылъхэр.

Зэнэкъокъум къыдыхэлъытэгъэн фае илъэсыкIэ джэгуа­лъэхэр ашIыхэ хъумэ лъэпкъ шIыкIэм диштэу щытынхэр. Iэпэ­Iасэ пэпчъ IофшIэгъищым нэс къыгъэхьазырын ылъэкIыщт. Джэгуалъэм иинагъэкIэ сантиметрэ 15-м ехъу хъущтэп.

ИлъэсыкIэ джэгуалъэхэу зэ­нэкъокъум къырахьылIэхэрэр лъэпкъ шIыкIэм тетэу ыкIи илъэ­сыкIэ нэшанэр къыраIотыкIэу, щынэгъончъэу, илъэсыкIэ чъыгым пыплъэшъунхэ плъэ­кIынэу гъэпсыгъэнхэ фае. Лъэ­ныкъо пэпчъ зы баллым къыщегъэжьагъэу балли 5-м нэсэу уасэ фашIыщт.

ИлъэсыкIэ джэголъэ хьазыр­хэу зэнэкъокъум къыхагъэла­жьэхэрэр 2019-рэ илъэсым тыгъэгъазэм и 19-м мынахь кIасэу Адыгэ Республикэм ­лъэпкъ культурэмкIэ и Гупчэ къы­рахьылIэнхэ фае. Ар мыщ фэдэ чIыпIэм щыI: Мыекъуапэ, Шэу­джэным ыцIэ зыхьырэ урамым тет унэу 356-рэ. ШэкIо­гъум и 20-м къыщыублагъэу тыгъэ­гъа­зэм и 25-м нэс IэшIагъэу къы­рахьылIагъэхэм комиссиер ахэ­плъэщт, анахь дахэу, гъэшIэ­гъонэу шIыгъэхэр къыхихыщтых.

ЗэкIэ зэнэкъокъум хэлажьэ­хэрэм Ассоциацием идипломхэр аратыщтых. Анахь илъэсыкIэ джэголъэ дэгъумкIэ текIоныгъэ къыдэзыхыхэрэ апэрэ нэбгырипшIымэ дипломхэр аратыщтых ыкIи АР-м и ЛIышъхьэ ыцIэкIэ агъэуцурэ илъэсыкIэ чъыгэу тыгъэгъазэм ыкIэхэм адэжь щыIэщтым рагъэблэгъэщтых. IофшIагъэу къырахьы­лIагъэхэр зэкIэ Ассоциацием имузееу агъэпсыщтым щаIы­гъыщтых.