Сакъыныгъэ къызхэжъугъаф!
ЩыIэныгъэм къызэригъэлъагъорэмкIэ, лъэсрыкIохэр нахьыбэрэмкIэ гъогу хъугъэ-шIагъэхэм захафэхэрэ уахътэр пчыхьэшъхьэпэ шIункIыр е ом изытет елъытыгъэу тэрэзэу хэмылъэгъукIхэ зыхъукIэ ары.
Бжыхьэ ыкIи кIымэфэ уахътэхэу мафэр кIако зыщыхъурэм лъэсрыкIохэм щынагъор нахь къашъхьэрэхьэ. Зыныбжь имыкъугъэхэр ащ фэдэ гъогу хъугъэ-шIагъэхэм ахэмыфэнхэм фэшI инспекторхэм кIэлэегъаджэхэр ыкIи ны-тыхэр ягъусэхэу Адыгеим ит гъэсэныгъэм иучреждениехэм зэкIэми Iофтхьабзэу «Засветись» зыфиIорэр ащырагъэкIокIыгъ.
КIэлэеджакIохэм нэфынэр къэзытырэ ныбалъэхэр зыщалъэнхэу араIуагъ. Джащ фэдэу яшъуашэхэм къэнэфырэ пкъыгъохэр ахалъхьэхэмэ гъогум нахь къызэрэщылъэгъощтхэр агурагъэIуагъ.
Къутырхэу ыкIи поселкэхэу лъэсрыкIо гъогу зыдэщымыIэхэу, остыгъэхэр къызщымынэфхэрэм сакъыныгъэ нахь къызщыхагъэфэнэу Iофтхьабзэм изэхэщакIохэр къяджагъэх.
Iофтхьабзэм хэлэжьагъэхэм зэкIэми щынэгъончъагъэм ипкъыгъохэр аратыгъэх.