Пенсионеркэр агъэпцIагъ

Республикэм икъэлэ шъхьаIэ щыпсэурэ илъэс 80 зыныбжь бзылъфыгъэм Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм идежурнэ часть зыкъыфигъэзагъ. Ащ къызэриIуа­гъэмкIэ, ымышIэрэ цIыфхэм гъэпцIа­гъэкIэ сомэ мин 75-рэ шIуатыгъугъ.

Оперативникхэм зэрагъэунэфыгъэмкIэ, мы мафэм зы­ныбжь хэкIотагъэм иунэ нэбгыритIоу къыIухьагъэхэм медицинэм иIофышIэхэу зыкъагъэлъэгъуагъ ыкIи пенсионеркэм Iэзэгъу уцхэр ыщэфынхэу рагъэзыгъ.

А уцхэм узыбэ агъэхъужьэу бзылъфыгъэм гурагъэ­Iуагъ. ЫмышIэрэ цIыфхэм къыраIуагъэр ащ ышIошъ хъугъэ ыкIи сомэ мин 75-рэ зытефэрэ «уцхэр» (БАД-хэр) ыщэфыгъэх. Сыхьат заулэ тешIагъэу къагъэпцIэн зэралъэкIыщтыр пенсионеркэм къыгурыIуагъ ыкIи полицием иотдел фытеуагъ.

Джы хэбзэухъумакIохэм уплъэкIунхэр рагъэкIокIых. Сыд фэдэ продукцие, анахьэу медицинэм епхыгъэхэр, шъущэфынхэм ыпэкIэ ащ ыосэ шъыпкъэ зэжъугъашI, шъумышIэрэ цIыфхэм къаIорэр шъумыгъэцакIэ.

Зыныбжь имыкъугъэ­хэм афэгъэхьыгъ

Iэтахъохэм правовой IэпыIэгъу ягъэгъотыгъэным и Мафэ къыдыхэлъытэгъэ Iофтхьабзэхэр Адыгеим иеджэпIэ учреждениехэм ащыкIуагъэх.

Мыекъуапэ дэт лицееу N 19-м ыкIи гимназиеу N 22-м ащыкIогъэ зэхахьэхэм хэбзэухъумэкIо къулыкъухэм ялIыкIохэр ахэлэжьагъэх. Наркотикхэм ыкIи психотропнэ пкъыгъохэм тхьамыкIагъоу къыздахьырэр, псауныгъэр зэрэзэщагъакъорэм дакIоу щыIэныгъэри ащ зэпаутын зэралъэкIыщтыр я 10-рэ классхэм арыс кIэлэеджакIохэм къафаIотагъ.

ГъогурыкIоныр щынэгъончъэныр

ГъогурыкIоныр щынэгъончъэнымкIэ Къэралыгъо автоинспекцием АдыгеимкIэ и ГъэIорышIапIэ икъулыкъушIэхэмрэ сабыйхэм яфитыныгъэхэмкIэ Уполномоченнэу республикэм щыIэ Александр Ивашинымрэ республикэм икъэлэ шъхьаIэ дэт кIэлэцIыкIу IыгъыпIэхэм ащыщхэм ащыIагъэх.

Гъогум узэрэщызекIон, шапхъэхэр бгъэцэкIэнхэ зэрэфаер ахэм кIалэцIыкIухэм къафаIотагъ.

ЗэдэгущыIэгъур кIэлэцIыкIухэм ашIогъэшIэгъоныгъ, хьакIэхэм упчIэхэр къаратыгъэх, джэуапхэри агъотыгъэх.

Адыгеим хэгъэгу кIоцI IофхэмкIэ и Министерствэ ипресс-къулыкъу.