Республикэ общественнэ движениеу «Адыгэ Хасэм» игъэцэкIэкIо куп изэIухыгъэ зэхэсыгъо Лъэпкъ театрэу Цэй Ибрахьимэ ыцIэ зыхьырэм иIофыгъохэм щатегущыIагъэх.

Театрэм и Илъэс Урысыем щэкIо. Ар къыдалъыти, Адыгэ Хасэм хэтхэмрэ Правительствэм икъулыкъушIэхэмрэ зэIукIэгъу зэхащагъ. Театрэр, адыгабзэм изэгъэшIэн, лъэпкъ Iофыгъохэр зэрэзэпхыгъэхэм къапкъырыкIыхэзэ, уахътэм диштэрэ пшъэ­рылъхэм ягъэцэкIэн зэрэпылъы­щтхэр зэхахьэм къыщыхагъэщыгъ.

— Лъэпкъ шIэжьым, шэн-хабзэхэм, патриотическэ пIуныгъэм яхьылIэгъэ къэгъэлъэгъонхэр непэ лъэшэу тищыкIагъэх, — къыIуагъ Адыгэ Хасэм ипащэу ЛIымыщэкъо Рэмэзан. — Адыгабзэм изэгъэшIэн, игъэфедэн тиIофыгъо шъхьа­Iэхэм ахэтэлъытэ. Лъэпкъ театрэр тикъуаджэхэм нахьыбэрэ ащыIэн, цIыфхэм нахь ашIогъэшIэгъон спектаклэхэр къащигъэлъэгъон фае.

Адыгэ Хасэр зычIэт унэм кIэлэцIыкIу театральнэ зыгъэсапIэу «Щыгъыжъыем» иIэпэIэсэныгъэ щыхегъахъо. АдыгабзэкIэ къэгущыIэн зымылъэкIыщтыгъэ кIэлэцIыкIухэр сценэшхом къытехьагъэх, Тыркуем щыкIогъэ Дунэе фестивалым хэлэжьагъэх, художественнэ пащэр Адыгэ Респуб­ликэм инароднэ артисткэу Уджыхъу Марыет. «Щыгъыжъыем» Адыгеим и Къэралыгъо шIухьафтын къыфагъэшъошагъ.

Щысэ зытепхын плъэкIыщтхэр тиIэх. Лъэпкъ театрэм артист цIэрыIохэм Iоф зэрэщашIэрэр, режиссер дэгъухэр зэрэтиIэхэр зэхахьэм къыщаIуагъ. Художественнэ пащэу ХьакIэгъогъу Къэсэй зэлъашIэрэ режиссер. Лъэпкъ театрэм иIофхэр лъыгъэ­кIотэгъэнхэм фэшI хэкIыпIэхэм пащэхэр алъыхъунхэ фае.

Хабзэм икъулыкъушIэхэм, театрэм, Адыгэ Хасэм язэпхыныгъэхэр сыдэущтэу агъэпытэщтха? Театрэм иилъэс IофшIэгъу мыгъэ къызызэIуехым, зэхахьэр игъэкIотыгъэу зэхащагъэп. Артистхэр пчэгум къытыращагъэхэп, афэгушIонхэ алъэкIыгъэп.

Къэгъэлъэгъонхэр нахьыбэрэ адыгабзэкIэ зэрэзэхащэщтхэм тегъэгушIо. МэщфэшIу Нэдждэт къызэриIуагъэу, Лъэпкъ театрэр республикэм зэрэфэлэжьэрэ шIыкIэр иIофшIагъэхэм къахэщын фае. «Кавказский меловой кругыр» бзэ зэфэшъхьафхэмкIэ къы­зэрагъэлъагъорэм мэхьэнэ хэхыгъэ етэты, ау адыгабзэр ары тэ анахьэу тищыкIагъэр.

ЦIыкIушъо Аслъан, Къэзэнэ Юсыф, Болэкъо Аслъан спектаклэхэр нахь гъэшIэгъонэу агъэ­уцунхэ фаеу къаIуагъ. Хъот Юныс театрэм иныбджэгъу, ар зэмыплъыгъэ спектаклэ Лъэпкъ театрэм къыщагъэлъэгъуагъэп. Театрэр цIыфхэм алъыIэсынымкIэ икъоу иамалхэр ымыгъэфедэхэу зылъытэхэрэм къаIуагъэм узэгупшысэн хэлъ.

СурэтышI-модельер цIэрыIоу СтIашъу Юрэ театрэм цIыфыр зэрипIурэм, лъэпкъ гупшысэр щыIэныгъэм зэрэщыпхырищырэм иеплъыкIэхэр къариIолIагъ. Артист цIэрыIоу, драматургэу Пэрэныкъо Чатибэ ипьесэу «О, си Тхь, къыс­фэгъэгъу» зыфиIорэр наркоманием, мыхъо-мышIагъэхэр зезы­хьэхэрэм, тинамыс зыуцIэпIыхэ­рэм апэшIуекIо. Лъэхъаным ди­штэрэ спектаклэр нахьыбэрэ къагъэлъэгъон фаеу зылъытэ­хэрэм Ю. СтIашъум адырегъаштэ.

Бэгъушъэ Алый, Тхьапшъэкъо Альберт, Болэкъо Аслъан лIэуж­хэм язэпхыныгъэ игъэпытэн теат­рэр зэрэфэлажьэрэм къытегущыIагъэх. МэщфэшIу Нэдждэт, СтIашъу Юрэ, Болэкъо Аслъан, нэмыкIхэм яеплъыкIэхэр уахътэм дештэх. КIэлэцIыкIухэр, ныбжьыкIэхэр театрэм фэщагъэхэу пIугъэнхэм фэшI тизэIукIэгъухэм зядгъэушъомбгъущт. Адыгэ Рес­публикэм культу­рэмкIэ иминистрэу Аулъэ Юрэ Лъэпкъ театрэу И. Цэим ыцIэ зыхьырэм иIофыгъохэм къари­IолIагъэр уахътэм къыпкъырэкIы. Театрэр зычIэт унэм изэтегъэ­псыхьан, фэIо-фашIэхэм ягъэцэкIэн, артистхэм яегъэджэн, фэшъхьаф Iофыгъохэм Правительствэр адэлажьэ. Ти ЛIышъхьэу КъумпIыл Мурат театрэм щылажьэхэрэм аIокIэ, Iоф­хэм язытет щыгъуаз.

Министрэм зэрилъытэрэмкIэ, Лъэпкъ театрэм ищыIакIэ зыпкъ иуцоным фэшI илъэси 4 – 5 тешIэщт. Уахътэм игъэфедэн непэ зыфагъэхьазыры. Пьесэхэр кIэу зытхыщтхэм, спектаклэхэр зыгъэ­уцущтхэм тащыкIэрэп, ахэр тиIэх. Кадрэхэм Iоф адэшIэгъэныр пшъэ­рылъ шъхьаIэхэм ащыщ. Тиартистхэм рольхэр дэгъоу къашIыхэу тэлъытэ, ау гущыIэу къаIорэр аIупшIыкIыныр къытэхьылъэкIэу къызэрэхэкIырэм тегъэгумэкIы. Арэу щытми, театрэм шIушIагъэу иIэр зыпэтшIын щыIэп.

Адыгэ Хасэм джырэблагъэ зэIукIэгъоу иIэщтым Лъэпкъ театрэм ипащэхэр, артистхэр къырагъэблэгъэщтых, тызыгъэгумэкIырэ Iофыгъохэм атегущыIэщтых.