Ным и Мафэ фэгъэхьыгъэ мэфэкI зэхахьэу Къэралыгъо филармонием щыкIуагъэм хэлэжьагъ Адыгэ Республикэм и ЛIышъхьэу КъумпIыл Мурат.

«Ны» — а гущыIэм ылъапсэ чыжьэу хэкIуатэ. Гупшысэ куоу хэлъым укъегъэфабэ. Сыд фэдабзэкIэ къэIуагъэми, ащ шIулъэ­гъуныгъэ шъабэу пхырыщыгъэр зэхэошIэ. Ным мэхьанэу иIэр къыдалъытэзэ, ащ фэгъэхьыгъэ мэфэкI мафэр зэрэдунаеу хагъэу­нэфыкIы.

КъумпIыл Мурат мэфэкI лъа­пIэмкIэ къэзэрэугъоигъэхэм къафэгушIуагъ, сабыибэ зыпIу­хэрэ ыкIи ны-тыхэр зышъхьарымытыжьхэр зыпIунхэу зыштагъэхэ ныхэм анахьэу шъхьэкIэ­фэныгъэ къызэралэжьырэр ащ игущыIэ къыщыхигъэщыгъ.

— Ным щыIэныгъэр къытеты, апэрэ лъэбэкъухэр тшIынхэу зыщедгъа­жьэрэм къыщыубла­гъэу тиIэпыIэгъоу дунаим тырэкIо. Бзылъфыгъэм исабый ыпIун, хэхъоныгъэхэр ышIынхэм фищэным пае республикэм Iофыгъоу щызэшIотхырэр бэ. КIэлэцIыкIу IыгъыпIэхэр, гурыт еджа­пIэхэр, культурэм ыкIи спортым фытегъэ­псыхьэгъэхэ объектхэр тэшIых, общественнэ чIыпIэхэр тэгъэкIэжьых, — къыIуагъ Адыгеим и ЛIышъхьэ.

Непэрэ мафэм ехъулIэу сабыибэ зэрыс унэгъо минибл Адыгеим щэпсэу. Ахэм ащыщэу унэгъо мини 5-м ехъумэ социальнэ IэпыIэгъухэр агъэфедэх. Унэгъо мини 2-м ехъумэ апэрэ сабыир къызыхъукIэ мазэ къэс къатырэ ахъщэ тыныр афэкIо.

2011-рэ илъэсым къыщегъэ­жьагъэу сабыищ е нахьыбэ зэрысхэ унагъохэм ыпкIэ хэмылъэу къэралыгъом е муниципалитетым иунэе чIыгу Iахьхэр аратых. Унэгъо 3633-мэ ахэр аратыгъэх.

2020-рэ илъэсым къыщегъэ­жьагъэу ящэнэрэ е ащ къыкIэлъыкIорэ сабый къызэрыхъу­хьэхэрэ унагъохэм урыпсэункIэ анахь ахъщэ макIэу агъэ­нэфа­гъэр къэхъугъэр илъэ­­сищ охъуфэ мазэ къэс аратыщт. Хэбзэгъэуцугъэм зэхъокIыны­гъэу фэхъугъэм къызэриIорэмкIэ, сабыибэ зэрысхэ унагъохэм ясабый анахьыжъ илъэс 18 хъугъэми, фэгъэкIотэнхэр къагъэнэжьыщтых.

— ФэIо-фашIэхэр зэкIэ зыфэгъэхьыгъэхэр сабыибэ зэрысхэ унагъохэм ящыIэкIэ-псэукIэ нахьышIу шIыгъэным, обществэм чIыпIэу щаубытырэм зыкъегъэIэтыгъэным, республикэм демографием изытет нахьышIу щышIыгъэным тыфэкIоныр ары, — къы­Iуагъ КъумпIыл Мурат.

Лъэпкъ проектэу «Демография» зыфиIорэм къыдыхэлъытагъэу сабыитIу е нахьыбэ зиIэхэ унагъохэм фэгъэкIотэныгъэ яIэу ипотекэ ашIын амал щыI. ТапэкIи къэралыгъор унагъо­хэм, ным IэпыIэгъу афэ­хъуным зэрэфэкIощтыр респуб­ликэм и ЛIышъхьэ къыхигъэ­щыгъ.

Нэужым дипломэу «Материнская слава» зыфиIорэр сабыибэ зыпIухэрэ ныхэм КъумпIыл Мурат аритыгъ. Мыщ фэдэ тын лъапIэ Надежда Коваленкэм, Тхьагъэ­псэу Саидэ, Ольга Ованесян, Бэгъушъэ Светланэ, Галия Тухтаровам, Оксана Голдовам, КIыкI Аминэт, Инна Клочковам, Дина Исаевам, Мария Головановам къафагъэшъошагъ.

Зэо зэпэуцужьхэм апсэ емыблэжьэу ащызэуагъэхэу, ахэм ащыфэхыгъэхэр зыпIугъэхэ ныхэм шъхьэкIэфэныгъэшхо къы­зэралэжьырэр Iофтхьабзэм къыщыхагъэщыгъ. Адыгэ Рес­публикэм IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч ахэм ацIэ къыриIуагъ. Апсалямэ Сафыет, Нина Мирежкэ, нэмыкI­хэри сценэм къыдащэягъэх, гущыIэ фабэхэмрэ шIухьафтын лъапIэхэмрэ афагъэшъошагъ.

МэфэкI Iофтхьабзэр концерт программэмкIэ лъагъэкIотагъ.

Гъонэжьыкъо Сэтэнай. Сурэтыр А. Гусевым тыри­хыгъ.