Урысыем ихьакъулахь къулыкъу иIофышIэ и Мафэ ипэгъокIэу Адыгэ Республикэм и ЛIышъхьэу КъумпIыл Мурат мы структурэм и ГъэIорышIапIэу тишъолъыр щыIэм ипащэу ДышъэкI Адам IофшIэгъу зэIукIэгъу дыриIагъ.

ДышъэкI Адам тызхэт илъэ­сым имэзипшI зэфэхьысыжьэу фэхъугъэхэм къатегущыIэзэ, республикэм хэхъоныгъэшIухэр зэриIэхэр къыхигъэщыгъ. Зэхэубытэгъэ бюджетыр сомэ миллиард 14-рэ миллиони 186-рэ мэхъу. БлэкIыгъэ илъэсым мыщ фэдэ иуахътэ егъэп­шагъэмэ, ар проценти 112-рэ е сомэ миллиардрэ миллион 479,7-рэ мэхъу.

ЧIыпIэ бюджетым мыгъэ сомэ миллиарди 9-рэ миллион 650-рэ рагъэхьагъ. БлэкIыгъэ илъэсым егъэпшагъэмэ, ар проценти 112-рэ е сомэ миллиардрэ миллион 28-рэ мэхъу.

— Илъэс къэс республикэм ыгъэфедэрэ мылъкум хэхъо, — къыIуагъ КъумпIыл Мурат. — БлэкIыгъэ илъэсхэм ха­хъоу тшIы­гъэхэм яшIуагъэкIэ грантхэр къытфэкIуагъэх, ахэр зищыкIагъэхэ лъэны­къохэм апэIудгъэхьагъэх. МэфэкIымкIэу хэбзэIахь къулыкъум Iоф щызышIэхэрэм сафэгушIо, гъэ­хъа­гъэхэр ашIыхэзэ ыпэкIэ лъыкIотэнхэу са­фэлъаIо.

Экономикэм хэхъоныгъэхэр ышIынхэм, шъолъырым зыпкъитыныгъэ илъыным Адыгэ Рес­публикэм и ЛIышъхьэ иIа­хьы­шхо зэрэхэлъыр ДышъэкI Адам игущыIэ къыщыхигъэ­щыгъ. Сыд фэдэрэ лъэныкъокIи ГъэIоры­шIапIэм IэпыIэгъу къызэрэфэхъу­рэр, ащ ишIуагъэкIэ пшъэрылъхэр зэшIохыгъэхэ зэрэхъухэрэр хигъэунэфыкIыгъ.

Гъонэжьыкъо Сэтэнай.