Адыгэ Республикэм и ЛIышъхьэу КъумпIыл Мурат пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Лукойл-КъыблэчIыдэгъэпродукт» зыфиIорэм игенеральнэ пащэу Юрий Ежовым, мыщ игъэцэкIэкIо директорэу Анатолий Пахомовым, компанием ишъолъыр гъэIорышIакIоу Георгий Быковым тыгъуасэ аIукIагъ. Адыгеим иминистрэхэм я Кабинетрэ компаниеу «Лукойлымрэ» зэзэгъыныгъэу зэда­шIыгъэм диштэу республикэмрэ компаниемрэ язэпхыныгъэ агъэпытэным, проектыкIэхэр, гухэлъыкIэхэр щыIэныгъэм щыпхырыщыгъэнхэм, нэмыкI Iофыгъохэм лъэныкъохэр атегущыIагъэх.

ЗэдэгущыIэгъум къыхэлэжьагъэх Адыгеим и Премьер-министрэу Александр Наролиныр, АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, республикэм экономикэ хэхъоныгъэмкIэ ыкIи сатыумкIэ иминистрэу Къуанэ Андзаур, нэмыкIхэри.

Адыгеим и ЛIышъхьэ Iоф­тхьабзэм пэублэ псалъэ къыщишIызэ, шъолъырым къэкIогъэ хьакIэхэм шIуфэс гущыIэхэмкIэ зафигъэзагъ. Илъэс 25-м ехъу­гъэу шъолъырым Iоф щызышIэрэ компанием иIофшIэн зэрэзэхищэрэм, зэфыщытыкIэ дэгъоу зэдыряIэм мэхьанэшхо ыкIи осэшIу зэрэфашIырэр, тапэкIи язэпхыныгъэ агъэпытэным яшъып­къэу зэрэпылъыщтхэр хи­гъэунэфыкIыгъ. 2018-рэ илъэсым зэдашIыгъэ зэзэгъыныгъэм къы­дыхэлъытагъэу компанием кIэлэцIыкIу площадки 4 респуб­ликэм щызэтыригъэ­псыхьагъ.

— Гъэстыныпхъэр зыщырагъэхъорэ станциехэм язытет зыпкъ игъэ­уцогъэным фэIорышIэрэ гъогу картэм къыдыхэ­лъытагъэу ахэм ащыщхэр компанием зэтыригъэ­псыхьагъэх. А Iоф­шIэныр джыри лъыжъугъэ­кIотэн фае. Сыда пIомэ гъэстыныпхъэр анахьыбэу рес­публикэм щыIузыгъэ­кIырэр, щызыщэрэр «Лукойлыр» ары. ЦIыф­хэм яфэIо-фашIэхэр шэпхъэшIухэм адиштэу жъу­гъэцэкIэнхэм, зэнэкъокъу шIыкIэм тетэу уасэхэр жъугъэуцунхэм тэркIэ мэхьанэшхо иI, — къыIуагъ КъумпIыл Мурат.

Юрий Ежовым къызэриIуа­гъэм­кIэ, непэрэ мафэм ехъулIэу компанием истанцие 21-мэ Адыгеим Iоф щашIэ. 2014 — 2018-рэ илъэсхэм мыхэм ягъэцэ­кIэжьын, язэтегъэпсыхьан халъ­хьэгъэ инвестициер сомэ миллион 500-м кIахьэ. ЦIыфхэм апашъхьэкIэ социальнэ пшъэ­дэкIыжь зэрихьырэр «Лукойлым» къыгурэIо, зэхешIэ. — Адыгеим хэхъоныгъэхэр зэришIыхэрэр, ыпэкIэ зэрэлъы­кIуатэрэр тинэрылъэгъу. Шъо­лъырым псэолъакIэхэр, гъогу­кIэхэр щашIых, щызэтырагъэп­сыхьэх. Ахэм ащыщхэу тэ ты­наIэ зытетыдзагъэр Мыекъуапэ къэзыухьащтхэ гъогухэм, зэхэ­кIы­пIэхэм яшIын ары. Мы чIыпIэхэм тистанциехэр ащытшIыхэ тшIоигъу, ащкIэ республикэм ипащэ къыддыригъэштэнэу тыщэгугъы. Мы псэуалъэхэм гъэстыныпхъэр зэращырагъэхъощтым дакIоу тучан цIыкIухэр, шхапIэхэр, зыгъэпсэфыпIэ чIы­пIэхэр къащызэIутхынхэ тлъэ­кIыщт, — къыIуагъ Ю.Ежовым.

Республикэм ипащэ мы гухэ­лъым дыригъэштагъ ыкIи ащкIэ компанием IэпыIэгъу зэрэфэ­хъущтхэр ащ илIыкIохэм агуригъэIуагъ.

— Автомобиль гъогоу «М4-Дон» зыфиIорэм, джащ фэдэу тикъушъхьэхэм якIурэ гъогубгъу­хэр зэтегъэпсыхьэгъэнхэр пшъэрылъ шъхьаIэу зыфэтэгъэуцужьы. Мыхэм къащызэIутхырэ гупчэхэм, сатыушIыпIэхэм лъэпкъ шхыны­гъо­хэр, пкъыгъо зэфэшъхьафхэр къызэращыдгъэлъэгъощтым дакIоу цIыфхэр къызыщыуцунхэ, зызщагъэпсэфын алъэ­кIыщтхэ чIыпIэхэр къадыхэлъытэгъэнхэм мэхьанэшхо етэты. Гухэлъэу тиIагъэхэм ащыщхэр непэ щыIэныгъэм щыпхырыщыгъэхэ хъугъэх, адрэхэм Iоф адэтэшIэ. Компаниеу «Лукойлыр» мыщ фэдэ проектхэм ягъэцэкIэн къы­хэлэжьэнэу тыщэгугъы, — къыIуагъ Адыгеим и ЛIышъхьэ.

Шъолъырым къыщыдагъэкIырэ продукциер «Лукойлым» иавтостанциехэм къадыхэтхэ шхапIэхэм, тучанхэм ащаIуа­гъэкIынхэ амал щыIэным мэхьанэшхо зэрэратырэр къы­Iуагъ министрэу Къуанэ Андзаур. АщкIэ лъэныкъохэм екIолIэкIэ гъэнэфагъэ агъэфедэн фаеу ылъытагъ. Компанием илIыкIохэм а предложением дырагъэштагъ.

— Мы лъэныкъомкIэ Iоф­шIэнэу дгъэцакIэрэр зекIоным хэхъоныгъэ ышIыным иконцепцие фыте­гъэпсыхьэгъэн фае. Гъогубгъухэм къащызэIутхыхэрэ псэуалъэхэм къащыуцухэрэ цIыфхэм яфэIо-фашIэ зэрифэшъуа­шэу афэгъэцэкIэгъэн зэрэфаем дакIоу ящыкIэгъэ гъомылапхъэр ащэфыным, загъэ­псэфыным афытегъэпсы­хьэгъэнхэм мэхьанэшхо иI. Ащ фэдэ екIолIакIэм ишIуагъэкIэ Адыгеим къэ­кIохэрэ хьакIэхэм япчъагъэ хэхъощт, республикэр нэмыкI шъолъырхэм ащашIэным фэIоры­шIэщт, — къыIуагъ кIэухым КъумпIыл Мурат.

ТХЬАРКЪОХЪО Адам.