ЦIыфхэр зезыщэхэрэ транспортыр гъогу хъугъэ-шIагъэхэу зыхафэхэрэр нахь макIэ хъунхэм ыкIи щынэгъончъагъэр гъэпытэгъэным афэшI мы илъэсым шэкIогъум и 18 – 29-м республикэм ишъолъыр пэшIорыгъэшъ Iофтхьабзэу «Такси» зыфиIорэр щыкIощт.

Такси автомобиль псынкIэхэм яводительхэм гъогурыкIоным ылъэныкъокIэ зэрахьэхэрэ хэбзэукъоныгъэхэр гъогу патруль къулыкъум ихэушъхьафыкIыгъэ батальон икъулыкъушIэхэм къыхагъэщыщтых.

Анахьэу анаIэ зытырагъэтыщтыр лицензионнэ шапхъэхэр зэраукъохэрэр ары: ешъуагъэу транспортыр зэрафэмэ, водительскэ удостоверение аIыгъмэ, цIыфхэр зэращэнхэмкIэ фитыныгъэ яIэмэ, зэрэтакси­ир къэзыушыхьатырэ тамыгъэр ыкIи къэнэфырэ пкъыгъор хэбзэнчъэу тетхэмэ.

Техническэ регламентым щыгъэнэфэгъэхэ шапхъэ­хэм атетэу Iоф зэрашIэрэм, зызэрагъэпсэфырэм полицейскэхэм анаIэ тырагъэтыщт.

ЦIыфхэр зещэгъэнхэмкIэ фэIо-фашIэхэм ягъэцэкIэн ыкIи щынэгъончъагъэм язытет нахьышIу хъуным мы Iофтхьабзэр фэIорышIэным хэушъхьафыкIыгъэ батальоным иIофышIэхэр щэгугъых.