Адыгэ Республикэм ишъолъыр банк­хэм ахъщэу аралъхьэгъэ пчъагъэр чъэпыогъум и 1-м ехъулIэу сомэ миллиард 28,7-м нэсыгъ, ар ыпэрэ илъэсым елъытыгъэмэ, процент 12,4-кIэ нахьыб.

Мы пчъагъэм инахьыбэр цIыфхэм яахъщ – ар сомэ миллиард 24-рэ фэдиз, икIыгъэ илъэсым ебгъапшэмэ, проценти 9,3-рэ хэхъуагъ.

— Банкхэм ахъщэ арылъхьэгъэныр цIыфхэм агу рихьэу къызэрэхахырэр джыри къызэтенагъ. Къы­хэгъэщыгъэн фае лъэпкъ сомэм цIыфхэм цыхьэ зэрэфашIырэр ыкIи гъэтIылъыгъэ пстэуми япроцент 96-р ащ фэд, — къыIуагъ Урысые Федерацием и Гупчэ банк и Къыблэ гъэIорышIэпIэ шъхьаIэ АР-мкIэ Лъэпкъ банкым и Отделение игъэIорышIакIоу Сергей Самойленкэм.

Организациехэм банкхэм аралъхьэгъэ ахъщэр икIыгъэ илъэсым чъэпыогъум и 1-м ебгъапшэмэ, процент 23-кIэ нахьыбэ хъугъэ ыкIи сомэ миллиарди 2,2-м кIэхьагъ. Юридическэ лицэхэм – мэзибгъум къыкIоцI сомэ миллиард банкхэм ащагъэтIылъыгъ.