Илъэс 42-рэ зыныбжь хъулъфыгъэм ылъэныкъокIэ къызэIуахыгъэ уголовнэ Iофым Мыекъопэ къэлэ хьыкумыр хэплъагъ. Ешъуагъэу автомобилыр зэрифэзэ къызэраубытыгъэм фэшI хъулъфыгъэр агъэмысэ.

Хьыкумым зэрэщагъэунэфыгъэмкIэ, 2017-рэ илъэ­сым, бэдзэогъум мы бзэджэшIэгъэ дэдэмкIэ хъулъфыгъэм административнэ пшъэдэкIыжь тыралъхьэгъагъ.

Ащ ыуж, 2019-рэ илъэсым мэкъуогъум, гъогурыкIоным ишапхъэхэм алъэныкъокIэ административнэ хэбзэукъоныгъэ зэрихьагъэу егуцафэхи, гъогу-патруль къулыкъум иIофышIэхэм хъулъфыгъэр къагъэуцугъ. Нэужым медицинэ уплъэкIунхэр зарагъэшIхэм, ар ешъуагъэу къычIэкIыгъ.

Къэралыгъо гъэпщынакIом ышIыгъэ унашъом хьыкумым дыригъэштагъ. Хъулъфыгъэм пшъэдэкIыжьэу сыхьат 280-м къыриубытэрэ шIокI зимыIэ IофшIэнхэр тыралъхьагъэх, ащ нэмыкIэу илъэси 2-рэ мэзи 6-кIэ автомобилыр зэрифэн фимытэу иправэхэр Iахыгъэх.

Унашъом кIуачIэ иIэ хъугъэ.