Мы щытхъуцIэр зыфагъэшъошагъэр къызщынэфэгъэ республикэ зэнэкъокъум изэфэхьысыжьхэр ашIыгъэх.

ЫпэкIэ мыщ текIоныгъэр къыщыдэзыхыгъэр Мыекъопэ районыр ары. Ащ къыхэкIыкIэ лъэпкъ культурэм и Гупчэу псэупIэу Тульскэм дэтым Iофтхьабзэр щырагъэкIокIыгъ. Ащ кIэщакIо фэхъугъэх АР-м культурэмкIэ и Министерствэрэ Адыгеим лъэпкъ культурэмкIэ и Гупчэрэ. Республикэм щагъэцэкIэрэ къэралыгъо программэу «Культурэм хэхъоныгъэ ышIыныр» зыфиIорэм ыкIи Хэгъэгум иухъумакIо и Илъэсэу мыгъэ Урысыем щагъэнэфагъэм зэнэкъокъур къыдыхэлъы­тагъ. МэфэкI шIыкIэм тетэу ар къызэIуи­хыгъ АР-м культурэмкIэ иминистрэ игуадзэу Ольга Гавшинам.
— Урысыем ыкIи Адыгеим яправительствэхэм культурэм лъэшэу анаIэ тырагъэты. Культурэм иуни 130-рэ рес­публикэм ит. Мы пчъагъэм щыщэу кIэу агъэуцугъэр ыкIи агъэцэкIэжьыгъэр 60 фэдиз. Мыекъопэ районыр шъхьафэу пштэмэ, аужырэ илъэсихым культурэм иуни 6 щагъэкIэжьыгъ, псэупIэу Кужорскэм дэтым, 2025 — 2026-рэ илъэсхэм ателъытагъэу, игъэкIотыгъэ гъэцэкIэжьыныр щаублэщт. Ащ фэшъхьафэу тшIэрэр бэ, — къыIуагъ Ольга Гавшинам.
Мыекъопэ районым щыкIогъэ уцугъор зэнэкъокъум ия 2-рэ Iахь хъугъэ. Шъхьадж ирайон ыкIи икъалэ щыкIуагъэ­хэм анахь дэгъухэу къащыхахыгъэхэр Тульскэм щызэIукIагъэх. Ахэр шъолъырым ирайониблымэ ыкIи икъалэхэм къарыкIыгъэ нэбгырибгъу: ЖэнэлI Асиет (Адыгэкъал), Валерий Овчаренкэр (Мыекъуап), Давид Гогуа (Джэджэ район), Алексей Толмачевыр (Кощхьэблэ район), Дмитрий Макаровыр (Красногвардейскэ район), Валерия Антипьевар (Мыекъопэ район), ХыдзэлI Саниет (Тэхъутэмыкъое район), Хъут Зарем (Теуцожь район), Мэрэтыкъо Зарин (Шэуджэн район).
Ахэм лъэныкъуищкIэ зыкъагъэлъэ­гъуагъ. Апэрэм къыдыхэлъытагъэу «Культурэм игъэпсакIу» зыфиIорэмкIэ ежьхэм къэбар къаIотагъ. ЯтIонэрэмкIэ «Сэнаущы­гъэм имэшIуач» цIэу зыфашIыгъэмкIэ зэчыеу шъхьадж хэлъыр къыгъэлъэ­гъуагъ. Ящэнэрэ, кIэух лъэныкъомкIэ, зэнэкъо­къум хэлэжьагъэхэм литературнэ-музыкальнэ къэгъэлъэгъон къагъэхьазырыгъ. Ар Хэгъэгу зэошхом фэгъэхьыгъэнэу щытыгъ. ОсэшI купым ахэм афигъэуцугъэ пчъагъэхэм язэфэхьысыжьхэмкIэ «Культурэм иIофышIэ анахь дэгъу» зыфиIорэ цIэ лъапIэр 2025-рэ илъэсымкIэ респуб­ликэм къыщызылэжьыгъэр Тэхъутэмыкъое районым илIыкIоу ХыдзэлI Саниет. Зэнэкъокъум ишIухьафтын шъхьаIэу сомэ минишъэр ащ фагъэшъошагъ. Ащ фэ­шъхьа­фэу, Мыекъопэ районым игукъэкI­кIэ, мыгъэ къыщегъэжьагъэу текIоны­гъэр зыхьырэм кубок раты. ЫужыкIэ ар зэIэпахызэ ашIыщт. Ащ фэшъхьафэу зэнэкъокъум хэлэжьэгъэ нэбгырэ пэпчъ сомэ минипшI зырыз аратыгъ. Шъхьафэу зэнэкъокъум хэлэжьагъэхэм къахагъэщыгъ Шэуджэн районыр къэзыгъэлъэгъо­гъэ Мэрэтыкъо Заринэ. Адыгеим культурэмкIэ иIофышIэхэм япрофсоюзхэм яшIухьафтын ащ фагъэшъошагъ.
Культурэм иIофышIэ анахь дэгъур къызщынэфэщт зичэзыу зэнэкъокъур джы илъэситIукIэ Тэхъутэмыкъое районым щыкIощт. 2023-рэ илъэсым къыщегъэжьагъэу ар илъэситIум зэ зэхащэ.
— Сэнэхьатым имэхьанэ къэIэтыгъэныр, ныбжьыкIэхэр мы IофшIэным хэщэгъэнхэр зэнэкъокъум ипшъэрылъых. Культурэм иIофышIэхэм IэпэIэсэныгъэ инэу къагъэлъагъорэр ахэмкIэ щысэ мэхъу. Ащ изакъоп, культурэм щыла­жьэхэрэр шIэныгъэхэмкIэ зэхъожьынхэмкIэ, зэрэшIэнхэмкIэ зэнэкъокъур амалышIу. НэмыкI псэупIэм щылэжьэрэ иIофышIэгъум шIыкIэу ыгъэфедэхэрэр адырэми ыштэн, иIофшIакIэ хигъэщэн ылъэкIыщт. Сыдэу щытми зэфэхьысыжьыбэ уагъэшIы мыщ фэдэ зэнэкъокъухэм, — еIо АР-м лъэпкъ культурэмкIэ и Гупчэ ипащэ игуадзэу Анцокъо Фатимэ.
«Культурэм иIофышIэ анахь дэгъу» зыфиIорэ зэнэкъокъум икIэух едзыгъо, хабзэ зэрэхъугъэу, культурэм иIофышIэ и Мафэ ипэгъокIэу зэхащэ. Мыгъэ ар гъэтхапэм и 25-м хагъэунэфыкIыщт.
Анцокъо Ирин.
Сурэтыр: АР-м лъэпкъ культурэмкIэ и Гупч.