Мыекъопэ къэзэкъ отделым ия 38-рэ шIушIэ IэпыIэгъоу тонни 4-м ехъурэр чъэпыогъум и 31-м къыщегъэжьагъэу шэкIогъум и 3-м нэс хэушъхьафыкIыгъэ дзэ операцием хэлэжьэрэ дзэкIолIхэу Херсонскэ ыкIи Запорожскэ хэкухэм ащыIэхэм афащагъ.

ШIушIэ IэпыIэгъум хэлъыгъэх нэбгырэ гъэнэфагъэхэм апае посылкэхэр, маскировочнэ хъытыухэр, псэу зашъохэрэр, генераторхэр, пхъэххэр, автомобильхэм апае гъэстыныпхъэр ыкIи ахэм ахалъхьэ­рэ пкъыгъохэр, псэолъэшI материалхэр, гъомылэпхъэ зэфэшъхьафхэр, Iэзэгъу уцхэр, щыгъын фабэхэр, нэмыкIхэри. Адыгеим щыпсэухэу тидзэкIолIхэм афэгумэкIыхэрэм, яIахьыл-гупсэхэм ахэр къаугъоигъэх.

Автомобильхэр шIушIэ IэпыIэгъумкIэ зыушъагъэхэр Адыгеим икъэзэкъ ныбжьыкIэхэм я Союз ыкIи дзэ патриотическэ клубэу «Застава» зыфиIорэм хэт­хэр ары. Гъогу техьагъэхэм динлэжьэу Роман Малинкэ Тхьэм афелъэIугъ.

ХэушъхьафыкIыгъэ дзэ операцием хэлажьэхэрэм шIушIэ IэпыIэгъур афэзыщагъэхэр Мыекъопэ къэзэкъ отделым иатаманэу Александр Даниловыр, ащ игуадзэу Александр Роговыр, Адыгеим икъэзэкъ ныбжьыкIэхэм я Союз итхьаматэу Екатерина Загорулько, къэзэкъ отделым ихьыкум итхьаматэу Сергей Чернетовыр, Красногвардейскэ районым икъэзэкъхэм яатаманэу Сергей Брюхановыр, Кощхьэблэ районымкIэ атаманэу Олег Тарасенкэр, Апшеронскэ районымкIэ атаманэу Сергей Хлудневыр, Кужорскэм щыпсэурэ къэзэкъхэм яатаманэу Александр Хомяковыр, динлэжьхэу Николай Хатаговыр, Георгий Сычевыр, Иван Сычевыр.

Санкт-Петербург чылысым къакIохэрэм къаугъоигъэ мылъкумкIэ я 227-рэ Мые­къопэ артиллерийскэ бригадэм идзэ­кIолIхэм апае автомобилэу УАЗ «Буханка» зыфиIорэр динлэжьхэм къафащэ­фыгъ.

«КIэпсэжъыем» зызэпырэкIыхэм, Александр Даниловым къэзэкъ отделым итамыгъэу «За безупречную службу» зыфиIорэр реактивнэ батареем хэт къэ­зэкъхэм шIушIэ IэпыIэгъур къэугъоигъэ­ным зиIахьышIу хэзылъхьэрэ динлэжьэу Гергий Сычевым аритыгъ.

ХэушъхьафыкIыгъэ дзэ операцием хэлэжьэрэ тидзэкIолIхэм динлэжьхэр адэгущыIагъэх, зыдэщытхэ чIыпIэхэм Тхьэм щафелъэIугъэх.

— Яунагъохэм къафэзэщых нахь мышIэми, кIалэхэр нэгушIох. Сэлам фабэр пстэуми къарахыжьы ыкIи шIушIэ IэпыIэ­гъукIэ къафэгумэкIыгъэхэм «тхьашъуегъэпсэу» араIо, — хигъэунэфыкIыгъ станицэу Дахъо дэт чылысым идинлэжьэу, я 227-рэ Мыекъопэ бригадэм фэгъэзагъэу Николай Хатаговым.

Къэзэкъ-ухъумакIохэм агу къыдэзыщэягъэхэм ащыщых кIэлэцIыкIухэм атхыгъэ письмэхэр, ясурэтшIыгъэхэр ыкIи IэшIу-IушIоу афарагъэщагъэхэр. Мыекъуа­пэ щыпсэурэ илъэс 12 зыныбжь Александр Лапшовым къызыхъугъэ мафэм къыратыгъэ ахъщэ шIухьафтынымкIэ дзэкIолIхэм афигъэхьазырыгъэ IэшIу-IушIу къэмланхэр ахэм зэраратыгъэхэм Екатерина Загорулько видео къытырихыгъ.

— ДзэкъулыкъушIэхэм агу къыдэщэегъэным, тынаIэ зэратетыр зэхашIэным мэхьанэ иI. Зыщыщхэ чIыпIэм къикIырэ анахь къэбар цIыкIуми ахэр щэгу­шIу­кIых. Непэ пшъэрылъ шъхьа­Iэу тиIэр зэгорэм тятэжъ пIашъэ­хэм зэрашIыгъэм фэдэу тичIыгу фашизмэм щытыу­хъумэныр, тиунагъохэм, къыткIэхъухьэрэ лIэужхэм мамыр щыIакIэ яIэныр ары. ТекIоны­гъэр тиещт! — еIо хэушъхьафыкIыгъэ дзэ операцием хэлэжьа­гъэу Александр Роговым.

— Конвоир гъогум мэфищырэ тетыгъ, километрэ 2500-м ехъу акIугъ. А зэкIэри зыфашIэрэр тиухъумакIохэм агу къы­дащэеным, тызэракъотыр зэхарагъэшIэным пай. ТекIоныгъэм фэбэнэрэ дзэ­кIолIхэм сафэраз. Ахэм ящыкIэгъэ пкъыгъохэр къэтщэфынхэмкIэ зишIуагъэ къы­тэзыгъэкIыхэрэми «тхьашъуегъэпсэу» ясэIо, — къыIуагъ Мыекъопэ къэзэкъ отделым иатаманэу Александр Даниловым.

Екатерина Загорулько.