Top.Mail.Ru

Я 13-рэ пенсиер къытатыщта?

Image description

Предприятиехэм ыкIи организациехэм яIофышIэхэр илъэсым зэ загъэпсэфынэу IукIыхэ зыхъукIэ ахъщэу (отпускноеу) аратырэм ямэзэ лэжьапкIэ зэрамыхъокIырэ Iахьэу хэтым фэдиз афыхагъахъо.

Джащ фэдэу пенсие къызэратыхэрэми ахъщэ IэпыIэгъу ящыкIагъ, зэрэхэгъэгоу, советскэ лъэхъаным зиIофшIэгъу уахътэ тефагъэхэм зэкIэми япенсиехэр иныхэп.

Мы Iофыр къулыкъу зэфэшъхьафхэми, депутатхэми къамыIэтэу щытэп. «Справедливая Рос­сия – За правду» зыфиIорэ фракцием ипащэу Сергей Мироновым къызэриIуагъэмкIэ, пенсионерхэм къаратырэ ахъщэр зэрафимыкъурэм епхыгъэу агъэ­хьазырыгъэ законопроектыр Къэралыгъо Думэм фагъэхьыгъ. Ащ бжыхьэр имыкIызэ хэплъэнхэу депутатхэр мэгугъэх.

Законопроектым нахь къыхагъэщыгъэр ыкIи зыкIэлъэIухэрэр пенсионерхэм илъэсым ыкIэм я 13-рэ пенсие къаратызэ ашIынэу ары. Ахэм япчъагъэ макIэп, ау илъэсым зэ ахэр агъэгушIонхэр, агу къыдащэеныр къатефэ.

Мы Iофыр нэмыкI фракциехэми илъэс зэфэшъхьафхэм къаIэтэу къыхэкIыгъ, ау зэшIохыгъэ хъугъэп. Экспертхэми къаIо зыныбжь хэкIотагъэхэм япенсиехэр зэрэмакIэхэр. С. Мироновымрэ ащ дезыгъэ­штэрэ депутат купымрэ къыхагъэщы хабзэм илъэсыбэрэ Iоф фэзышIагъэхэм ящыкIагъэхэр зэрагъэгъотынхэм фэшI Iэпы­Iэгъу зэрафэхъущтхэ хэкIыпIэхэм зэ­ралъыхъухэрэр.

«Об изменениях в законе «О страховых пенсиях» зыфиIорэм фашIыгъэ зэхъокIыныгъэхэм ащыщ илъэс 80 зыгъэшIэгъэ пенсионерхэм япенсие къызэрэхагъэхъуагъэр, илъэс заулэ хъу­гъэу ар къараты.

«Справедливая Россия – За правду» зыфиIорэ фракцием хэтхэр илъэс 70-рэ зыгъэшIэгъэ пенсионерхэм япенсиехэми хэгъэхъонхэр къафашIынхэу кIэ­лъэIух, ар илъэсыкIэм икъихьагъу тырагъафэмэ нахьышIоу алъытэ.

«Пенсионерхэм IэпыIэгъу ящыкIагъ. Ахэм аратыщт ахъщэр ПенсиехэмкIэ фондым изакъоу фызэшIомыкIыщтми цIыфхэр щыкIэгъэнчъэу щыIэнхэмкIэ Фондым зэIуигъэкIэгъэ мылъкум­кIэ къыдеIэнэу амал иI», — еIо С. Мироновым.

Урысыем ипенсионерхэм я Союз ипащэу Валерий Рязанскэм пенсием кIогъэ цIыфхэм янахьыбэм ахъщэ IэпыIэгъу ящыкIагъэу елъытэ.

Къэралыгъо Думэм ибжыхьэ зэхэсыгъо я 13-рэ пенсием итын фэгъэхьыгъэ законопроектым щыхэплъэщтых. С. Мироновыр ар пхырагъэкIынэу мэгугъэ. «Пенсионерхэу Iоф зышIэхэрэми, зымышIэжьыхэрэми я 13-рэ пенсиер къалэжьыгъ. Ар къараты­ным тыфэбэнэщт», — къы­Iуагъ ащ.

Шъаукъо Аслъангуащ.