01-м къеты

Бжыхьэрэ дунаир къызыучъыIыкIэ, бэмэ яунэхэр электропкъыгъокIэ, хьакукIэ агъэплъэу аублэ. Ащ епхыгъэу цIыфхэр нахь сакъынхэу, тхьамыкIагъохэм защаухъумэным пае машIом зыкъымыштэнымкIэ шапхъэхэм адэмыхынхэу ятэIо.

МэшIогъэкIосэ къулыкъухэм яинспекторхэм уплъэкIун зэфэшъхьафхэр бэрэ зэхащэ. ПсэупIэхэр къакIухьэзэ ахэр цIыфхэм аIокIэх, машIом зыщыухъумэгъэнымкIэ шIэгъэн фаехэр зэрыт тхьапэхэр ахэм афагощы.

Урысые Федерацием и МЧС Адыгэ РеспубликэмкIэ и ГъэIорышIэпIэ шъхьаIэ иIофышIэхэм республикэм щыпсэухэрэм джыри зэ агу къагъэкIыжьы чэщрэ чъыенэу гъолъыжьынхэм е унэм икIынхэм ыпэкIэ электропкъыгъохэмрэ хьакухэмрэ язытет ауплъэкIун, электрогъучIычхэр зызэщыкъохэкIэ, ежь-ежьырэу ахэр амыгъэцэкIэжьэу, Iофым хэшIыкI фызиIэ специалистым къеджэнхэ, хьакухэмрэ IугъоищыпIэхэмрэ язытет ренэу лъыплъэнхэ, ахэм щыкIагъэу яIэхэр игъом дагъэзыжьынхэ зэрэфаер, зи алъымыплъэу, язакъоу кIэлэцIыкIухэр унэм къыранэхэ зэрэмыхъущтыр.

МашIом зыкъызиштэкIэ, телефонэу 01-мкIэ е 101-мкIэ мэшIогъэкIосэ къулыкъум псынкIэу шъуфытеуи, тхьамыкIагъор къызыщыхъугъэ чIыпIэр тэрэзэу яшъуIу. МашIом игъэкIосэжьынкIэ шъуфэлъэкIырэр зэкIэ шъушIэ. ЗыгорэкIэ ар зышъуфэмыгъэкIуасэкIэ, гъунэгъухэм макъэ яжъугъэIуи унэм шъукъикI. Мылъкум икъэгъэнэжьын уахътэ ешъумыгъэхь, анахь шъхьаIэр — шъушъхьэрэ нэмыкIхэу тхьамыкIагъом хэфагъэхэм ящыIэныгъэрэ къэшъуухъумэныр ары. Унэр къабгынэнымкIэ зыныбжь хэкIотагъэхэм, кIэлэцIыкIухэм, сэкъатныгъэ зиIэхэм шъуадеI. ЗэкIэми IэпыIэгъу шъуафэмыхъушъумэ, унэм цIыфхэр къызэринагъэр мэшIогъэкIуасэхэм яшъуIу.

ЦIыфхэр нахьыбэрэмкIэ кIодыпIэ изыдзэрэр мэшIожь гъозыр ары. ТхьамыкIагъо къямыхъулIэным пае машIом нахь пэIудзыгъэ унэм ихьэхэу, пчъэр пытэу фашIымэ, ащ инэзхэм хъэдэнхэр адакомэ нахьышIу. ТхьамыкIагъом хэфагъэхэм унэм къызэринагъэхэмкIэ сыд фэдэрэ шIыкIэкIи макъэ къагъэIун фае. Ащ пае ахэм шэкI бзыгъэ горэ шъхьаныгъупчъэм къырагъэщыми хъущт.

Къалэу Мыекъуапэрэ Мыекъопэ районымрэ ямэшIогъэкIосэ къулыкъу икъэралыгъо инспекторэу

В. А. МЕЖЕРАУНИС.