ЯIэпэIэсэныгъэ хагъахъо

Краснодар краим самбэмкIэ изэIухыгъэ шIэжь зэнэкъокъу Курганинскэ щыкIуагъ. Урысыем изаслуженнэ тренерэу Н. Нефедовым зэIукIэгъухэр фэгъэхьыгъагъэх.

БэнэкIуи 150-рэ фэдиз алырэгъум щызэнэкъокъугъ. Темыр Осетием — Аланием, Дагъыстан, Къалмыкъым, Ростов хэкум, Адыгеим, Краснодар краим къарыкIыгъэ бэнакIохэм якъулайныгъэ къагъэлъэгъуагъ. Адыгэ Рес­публикэм щапIугъэхэм хагъэунэфыкIырэ чIыпIэ 11 къыдахыгъ.

Гъомлэшк Анзор, кг 48-рэ, Хьакъуй Анзор, кг 60, Кирилл Литвиновым, кг 70-рэ, апэрэ чIыпIэхэр къыдахыгъэх. Тренерхэу А. Гъомлэшкыр, Р. Джарымэкъор, Е. Демченкэр япащэх.

Батмэн Амир, кг 52-рэ, Бэгъ Тимур, кг 60, Алалэ Азэмат, кг 65-рэ, тыжьыныр къыдахыгъ.

Кобл Рэмэзан, кг 48-рэ, Тэ­къаш Заур, кг 56-рэ, Нэгъой Ислъам, кг 56-рэ, Хьакъуй Амир, кг 65-рэ, ТIэшъу СултIан, кг 75-рэ, джэрзыр къафагъэшъошагъ. ТиныбжьыкIэхэм япащэх тренерхэу А. Мырзэр, А. Гъомлэшкыр, Н. Джарымэкъор, Р. Джарымэкъор, С. Мэрэтыкъор.

Республикэм самбэмкIэ испорт еджапIэ ипащэу, спортымкIэ дунэе класс зиIэ мастерэу Делэкъо Адам изэфэхьысыжьхэм къащыхигъэщыгъ тибэнакIохэм яIэпэIэсэныгъэ зэрэхагъахъорэр, хэгъэгум изэнэкъокъухэм ахэлэжьэнхэу зызэрагъэхьазырырэр.

Сурэтым итхэр: хагъэунэфыкIырэ чIыпIэхэр зэнэкъокъум къы­щыдэзыхыгъэхэр.