ЯIэпыIэгъу ыкIи ягущыIэгъу

Социальнэ IофышIэм игугъу тшIы зыхъукIэ апэу тынаIэ зытетыдзэрэр гущыIэу «IэпыIэгъур», нэжъ-Iужъхэм уишIуагъэ ябгъэкIыныр ары. Анахь къызэрыкIо фэIо-фа­шIэу къытщыхъухэрэр зыныбжь хэкIотагъэхэмкIэ къин дэдэу къыхэкIы. Ащ фэдэ чIыпIэм ахэм IэпыIэгъу афэхъурэр гу­кIэгъуныгъэ ин зиIэ цIыфхэр ары. Гъэнэфагъэ, мыщ фэдэ Iофыр зыгъэцакIэрэр цIыфхэм IэпыIэгъу афэхъуныр зыгукIэ къыхэзыхыгъэр ары.

Тыгъужъ Мариет социальнэ IофышIэу зылажьэрэр илъэс 16 хъугъэ. ИцIыф гъэпсыкIэкIэ зэкIэмэ жабзэ къадигъотын елъэкIы, ащ къыхэкIэу иIофшIэн къинэу ылъытырэп.

— IофшIэным сыIухьэ зэхъум зэрэмыпсынкIэщтыр сшIагъэ, ау нэжъ-Iужъхэм сямы­кIуным сытещыныхьагъэп. — Илъэс зэкIэлъыкIоу сызылажьэ­рэм къыкIоцI къысэхьылъэкIэу, сыIукIыжыныр сыгу къихьэу къыхэкIыгъэп.

ЦIыфхэм ясоциальнэ фэIо-фашIэхэр зыгъэцэкIэрэ комплекснэ Гупчэм икъутамэу Гъо­бэкъуае дэтым Тыгъужъ Мариет Iоф щешIэ. ТигущыIэгъу къызэриIуагъэмкIэ, IэпыIэгъу фэе цIыфым анахьэу ищыкIэгъэ фэIо-фашIэхэр къегъэ­нафэх, ахэр зэрыт документ агъэхьазыры. Нэужым ащ тетэу социальнэ IофышIэм иIофшIэн зэхещэ.

— Гъомылапхъэхэр къафэ­хьыгъэныр, Iэзэгъу уцхэр къэщэ­фыгъэныр, коммунальнэ фэ­Iо-фашIэхэм ятынкIэ IэпыIэгъу а­фэхъугъэныр, пщэрыхьанымкIэ сишIуагъэ язгъэкIыныр ары сиIофшIэн хахьэрэр, — къеIуатэ Мариет. — Джырэ уахътэм нэ­бгыри 9-мэ социальнэ IэпыIэгъу ясэгъэгъоты.

Хэтрэ цIыфи IофшIэным зы­IухьэкIэ пшъэрылъ гъэнэфагъэ­хэр зыфегъэуцужьых, ахэм ате­тыным пылъ. Мыщ фэдэ гухэлъхэр зыфишIыжьыгъагъэ­хэмэ зэдгъэшIэнэу тигущыIэгъу зыфэдгъэзагъ.

— Згъэрэзэнхэр, згъэгушIонхэр ары IофшIапIэм сызыIохьэм пшъэрылъ шъхьаIэу зыфэзгъэуцужьыгъагъэр, — игущыIэ лъегъэкIуатэ Мариет. — Сыдигъуи ар сымыукъоу, ыпэкIэ езгъэ­хъуным сыпылъ. IэпыIэгъу сыз­фэхъурэ нэжъ-Iужъхэр къы­зэрэсфыщытхэм мэхьанэшхо есэты. Ахэр къысфэдэгъух, гу­фэбэныгъэу апэзгъохырэр зэхашIыкIы. IэпыIэгъу сызфэ­хъухэрэм сэнэхьат гъэшIэгъонхэмкIэ Iоф зышIэщтыгъэхэр ахэ­тых. Ахэм къысфаIуатэрэм сигуапэу седэIу, гупшысэ гъэшIэ­гъонхэр сагъэшIых. Садэжь сы­къэкIожьыгъэми, къысфаIотагъэхэр сыгу къэкIыжьхэу, зэхэс­фыхэуи бэрэ къыхэкIы.

Мариет иIофшIэн шIу елъэгъу, ыгу етыгъэу егъэцакIэ. ИIоф­шIэгъу уахътэ ыухыгъэми нэжъ-Iужъхэм акIэрысэу бэрэ къыхэкIы.

— ФэIо-фашIэу афэпшIэщтым нахьи гущыIэгъу уафэхъуныр бэкIэ нахь зигопэ нэжъ-Iужъхэри ахэтых, — къыхегъэщы тигущыIэгъу. — «Сыдэущтэу тэщ фэдэу шэн зэфэшъхьафхэр зи­Iэхэм Iоф адэпшIэн плъэкIыра?» аIоу къысэупчIыхэуи къы­хэкIы. СицIыкIугъом щегъэжьа­гъэу нахьыжъхэм шъхьэ­кIэфэныгъэ афэсшIынэу, гукIэгъуныгъэ цIыфхэм афысиIэнэу са­гъэсагъ. Ар сиIофшIэнкIэ IэпыIэгъу къысфэхъугъэу сэлъытэ.

Гъонэжьыкъо Сэтэнай.