ЯIофшIэн хагъахъо, къуаем идэгъугъэ лъэплъэх

Щэ заводэу «Шовгеновский» зыфиIорэм иIофшIэн бэмышIэу ригъэжьэжьыгъ. ДжырэкIэ мыщ мафэм продукцие тонн 20 — 25-рэ къыщыдагъэкIы, ау IофшIэным хагъахъо, бжыхьэм чэщ-зымафэм тонн 50-м ехъу къыщыдагъэкIын гухэлъ яI.

Предприятием икоммерческэ пащэу Мэрэтыкъо Схьатбый къызэриIуагъэмкIэ, непэрэ мафэм ехъулIэу заводым «Сыр Адыгейский», «Чечел», «Косичка», «Сулугуни» зыфиIохэрэр къыщыдагъэкIых. Былымытхъуи ашIынэу рагъэжьагъ. Ащ фытегъэпсыхьэгъэ цехым ищыкIэгъэ Iэмэ-псымэхэр Урысыем имызакъоу IэкIыб къэралыгъохэми къащащэфыгъэх. Пащэм къызэриIуагъэмкIэ, тхъоу къыдагъэкIырэр шапхъэхэм зэрадиштэщтым пылъых, ар дэгъоу ащэфы.

Щэ заводэу «Шовгеновскэм» ипродукцие зыщащэрэм хагъэхъуагъ. Московскэ шъолъырым ит сатыушIыпIэ гупчэу ыпэкIэ Iоф зыдашIэщтыгъэ «Монетка» зыфиIорэм япродукцие раты. Тучан 200 фэдиз ащ епхыгъ. Ащ имызакъоу, нэмыкIхэми зэзэгъыныгъэ адашIы. Ахэм ащыщ сатыушIыпIэ сетеу «Магнолия» зыфиIорэр. Ащ епхыгъэ тучанхэр чIыпIэ зэфэшъхьафхэм арытых. Джащ фэдэу Къыблэ-Уральскэ шъолъырым итхэм ыкIи Хабаровскэ дэт сатыушIыпIэхэм Iоф адашIэнэу рахъухьэ. Ежьхэм ятранспорткIэ япродукцие Москва нагъэсызэ ашIыщт, нэужым авиакомпаниехэм е автотрейдхэм къуаер а шъолъырхэм ащэщтых. Тхьамафэ къэс япродукцие зэфэшъхьафхэр Хабаровскэ ащэх.

Товарым шапхъэу пылъхэр сатыушIыпIэ гупчэхэм нахь агъэлъэшыгъэх. Джы пщэчырэ продукциер о узыфаем кIоцIыпщыхьанэу щытэп. Зырызэу ащэн амал яIэным пае къуаем къыщэчырэр тетхэгъэнэу ахэм къагъэнафэ. Игъом продукциер нагъэсын фае, автомобилэу къуаер зэрэзэращэрэм ищыкIэгъэ температурэр итынэу щыт. Ахэр зэкIэ бгъэцэкIэнхэкIэ зэрэкъиныр пащэм къеIо, ау сатыушIыпIэ инхэм япродукцие амыщэмэ, зыщыIуагъэкIыщтыр щыIэщтэп.

Щэ заводэу «Шовгеновский» зыфиIорэм къыщыдагъэкIырэ къуаем идэгъугъэ зэлъашIэ. Шапхъэхэм адиштэу, ижъыкIэ агъэфедэщтыгъэ шIыкIэм фэдэу адыгэ къуаер ащ щашIы.

Щэу агъэфедэрэр анахьэу Краснодар ыкIи Ставрополь шъолъырхэм къаращых. Ащ нэмыкIэу щэр зыугъоихэрэм зэзэгъыныгъэ адашIыгъэу районым ичIыпIэ зэфэшъхьафхэм къащащэфыгъэ щэр аIахы. Мэрэтыкъо Схьатбый къызэриIуагъэмкIэ, джырэкIэ щэу республикэм къыщащэфырэр макIэ, ащ пае былымышъхьэм хэбгъэхъон фаеу елъытэ.

ДжырэкIэ щэ заводыр зэрэзэтегъэпсыхьагъэмкIэ чэщ-зымафэм щэ тонн 80 — 90-рэ ыштэн ыкIи продукциер хашIыкIын амал яI. Щэр зэрагъэхъощтыр, къуаер зыщагъэгъущтыр ыкIи нэмыкI Iэмэ-псымэхэр яIэх. ДжырэкIэ зы сменэм нэбгырэ 35 — 40-мэ Iоф ашIэ, ау щэ тонн 70 — 80-р чэщ-зымафэм къыдагъэкIынэу зырагъажьэкIэ, нэбгыри 100-м нагъэсынэу агъэнафэ.

«Адыгейский», «Спагетти» ыкIи «Косички» зыфиIорэ къое лъэпкъхэр IэкIэ ашIых, джащ фэдэу къуаем къыщэчырэр тыратхэ.

Шэуджэн районым имызакъоу, Кощхьэблэ ыкIы Джэджэ районхэм къарыкIыхэрэм заводым Iоф щашIэ. КъыдагъэкIырэ продукцием зыхагъахъокIэ, цIыфэу щылажьэхэрэм япчъагъи нахьыбэ хъущт, IофшIэпIэ чIыпIэ зэрагъэгъотыхэрэм ахэхъощт.

ДЕЛЭКЪО Анет.