Я 14-у зэхищагъ

УФ-м и Президентэу Владимир Путиным илъэс къэс зэхищэрэ пресс-конференциер тыгъуасэ, тыгъэгъазэм и 20-м, Москва щыкIуагъ.

Владимир Путиным Iофтхьабзэр къызэIуихызэ, ИлъэсыкIэ мэфэкIым ипэгъокI зэIукIэгъоу, хэбзэшIу ар хъугъэу зэрилъы­тэрэр къыIуагъ. Илъэсэу икIырэм хэхъоныгъэу Урысыем ышIыгъэ­хэм ар кIэкIэу къатегущыIагъ. ВВП-р процент 1,7-кIэ нахьыбэ зэрэхъугъэр, промышленностым зызэриушъомбгъу­рэр, IофшIэпIэ чIыпIэ зимыIэу къэралыгъом исым ипчъагъэ проценти 5,2-м къехи 4,8-м къызэрэнэсыгъэр, цIыфхэм мылъкоу къаIэкIахьэрэм, мыбэдэдэми, зэрэхэхъуагъэр, страхованиемкIэ пенсиехэр, гурытымкIэ лъытагъэу, сомэ 14163-рэ зэрэхъугъэр зигугъу къышIыгъэхэм ащыщых.

ИТАР-ТАСС-м икорреспондент иупчIэ апэрагъ. Лъэпкъ проектхэу жъоныгъокIэ мазэм Президентым ышIыгъэ унашъом­кIэ кIуачIэ зэритыгъэхэм ар афэгъэхьыгъагъ. Ахэм шIогъэ ин къамытыщтэу зылъытэхэрэр щыIэу ары журналистым къызэриIуагъэр, ащ еплъыкIэу фыриIэм къыкIэупчIагъ.

— Къэралыгъом инеущырэ мафэ пае непэ шIыкIакIэхэм талъы­хъун, ахэр пхырытщынхэм тыпылъын фае, ар шIокI зимыIэ Iофэу щыт — къыIуагъ Владимир Путиным. — Ары мы лъэпкъ проектхэр зытегъэпсыхьагъэхэр. Мыхэм къащыдэлъытагъэхэм ягъэцэкIэн триллион 20,8-рэ, инфраструктурэм изегъэу­шъомбгъункIэ Iофтхьабзэу дгъэнэфагъэхэм триллиони 6,5-рэ апэIудгъэхьан гухэлъ тиI.

Лъэпкъ проектхэм къащыдэлъытагъэхэм ягъэцэкIэнкIэ феде­ральнэ Гупчэмрэ субъектхэмрэ зэгурыIохэу Iоф зэдашIэным зэ­рэщыгугъырэм къыкIигъэтхъыгъ.

IэкIыб къэралхэм санкциехэр джыри нахь агъэлъэшынхэм къэралыгъор фэхьазырмэ къыкIэупчIагъэх. Ащ джэуап къыритыжьызэ, Урысыер IэкIыб къэралыгъохэр къызфыримыкъу­рэ нэкъокъогъушхоу зэрэщытым къыхэкIыкIэ ыкIуачIэ агъэцIыкIун гухэлъ яIэу санкциехэр къызэра­угупшысыгъэхэм, ахэр лъагъэ­кIотэнхэм пае ушъхьагъу зэфэшъхьафхэр къызэрагъотыхэрэм, ау ащкIэ зыпари къызэрэрамышIэшъущтым Владимир Путиным къыкIигъэтхъыгъ. Санкциехэм Iофыгъохэр къыздахьыгъэхэми, ахэм хэкIыпIэ къазэрафагъотыгъэр къыIуагъ, ахэр зыщыIэхэм къыщыублагъэу лъэныкъоу зызыушъомбгъугъэ­хэр щысэу къыхьыгъэх.

Мэкъумэщ хъызмэтым хэхъо­ныгъэу ышIыщтыгъэхэм мы илъэсым къызэращыкIагъэм ушъхьагъоу фэхъугъэм, гумэкIыгъо ащ къетымэ къэралы­гъом ипащэ къеупчIыгъэх. Мы отраслэм гумэкIыгъо къэзытын Iофыгъо имыIэу ащ ылъытагъ, щысэхэмкIэ, пчъагъэхэмкIэ ар къыушыхьатыжьыгъ. БлэкIыгъэ илъэсым лэжьыгъэ тонн миллиони 135-рэ къаугъоижьыгъагъ. Мыгъэ ом иягъэ субъектыбэхэм аригъэкIыгъ нахь мышIэми, тонн миллиони 110-рэ Iуахыжьыгъ. Аужырэ илъэс 25-м къэгъэлъэгъонэу мы лъэныкъомкIэ щыIагъэхэр пштэхэмэ, ари анахь IофшIэгъэ дэгъухэм ащыщэу ары Владимир Путиным къызэриIуа­гъэр. Мэкъу-мэщым IэпыIэгъоу ыгъотырэр тапэкIи зэрэлъагъэ­кIотэщтыр иджэуап къыщыхи­гъэщыгъ.

ПенсиехэмкIэ системэм зэхъо­кIыныгъэу фэхъущтхэм УФ-м и Президент еплъыкIэу афыриIэр шъхьэихыгъэу мызэу, мытIоу къыIуагъ нахь мышIэми, журналистхэм ащ къыфагъэзэжьыгъ, зэкIэпхьажьын плъэ­кIынэу щытмэ къыкIэупчIагъэх. Владимир Путиным ар хэкIыпIэ дэгъоу сыдигъуи зэримылъы­тэрэр, ау пенсионерхэм яфэIо-фашIэхэр икъоу ыкIи игъом къэралыгъом ыгъэцэкIэнхэмкIэ нэмыкI шIыкIэ зэрэщымыIагъэм къыкIигъэтхъыгъ.

Социализмэм къебгъэгъэзэжьын плъэкIынэу елъытэми Президентым къеупчIыгъэх. Зэрэщытэу ащ къебгъэгъэзэ­жьын умылъэкIыщтэу, ау а лъэхъаным щыIэгъэ шIыкIэхэм ащыщхэм непи ягъоу зэрилъы­тэрэр В. Путиным къыIуагъ.

Францием щыпсэухэрэр бензиным ыуасэ къэралыгъом къызэрэщаIэтыгъэм зэрэпэшIуе­кIохэрэр щысэ къахьызэ, Уры­сыем мы гъэстыныпхъэм ыуасэ щыдэкIоещтмэ, арэущтэу хъумэ цIыфхэм яеплъыкIэ шъхьэихыгъэу къыраIотыкIын алъэкIыщтмэ къыкIэупчIагъэх. Владимир Путиным Урысыем бензиныр къызэрэщылъэпIагъэм дыригъэ­штагъ, чIыдагъэм ыуасэ дунэе бэдзэршIыпIэхэм къызэращаIэтыгъэр ушъхьагъу шъхьаIэ ащ зэрэфэхъугъэр къыIуагъ. Джэуа­пым къызэрэщыхигъэщыгъэмкIэ, чIыдагъэм дэлажьэрэ компаниехэм бензиным ыуасэ къамыIэтыным, ары пакIошъ, къырагъэ­Iыхыжьыным фытегъэпсыхьэгъэ Iофтхьабзэхэм УФ-м и Правительствэ кIэщакIо афэхъугъ, къихьащт илъэсым игъэтхэпэ мазэ нэс ахэм кIуачIэ яIэщт. НДС-м къызэрэхэхъощтыр къы­дилъытэзэ, ащ ыпкъ къикIэу гъэтхэпэ ужым бензиныр къагъэ­лъапIэми, процент 1,5-м нахь мыбэщтэу ары къызэриIуагъэр. ЦIыфхэм сыдигъокIи яеплъыкIэ къыраIотыкIынэу фитыныгъэ зэряIэр, ащ зыпари зэрэпэшIуемы­кIощтыр, ау зэпстэури законым диштэн зэрэфаери къыхигъэ­щыгъ.

НыбжьыкIэхэм, цифровой телевидением, бзэджэшIагъэ зезыхьагъэу пшъэдэкIыжь зыхьыхэрэр зыщаIыгъ учреждениехэм, хэкIхэм ядэщын, статистикэм игъэпсын яIофыгъо­хэм, нэмыкI лъэныкъуабэхэм афэгъэхьыгъэ упчIэхэр журналистхэм къатыгъэх. Субъектэу къыздэкIыгъэхэм яIофыгъохэм ащыщхэр Владимир Путиным къылъызыгъэIэсыгъэхэри къа­хэкIыгъэх. IэкIыб политическэ зэфыщытыкIэхэми мымакIэу къакIэупчIагъэх.

Я 14-рэ пресс-конференциеу УФ-м и Президент зэхищагъэм пстэумкIи журналист 1702-рэ хэлэжьагъ. Гупчэ СМИ-хэм къызэратыгъэмкIэ, ахэм ащыщэу нэбгырэ 250-р IэкIыб къэралхэм яжурналистых. Адыгеим икIыгъэу ащ щыIагъэх гъэзетхэу «Адыгэ макъэмрэ» «Советскэ Адыгеимрэ» яIофышIэхэу Гъонэжьыкъо Сэтэ­наерэ Юлия Мельниковамрэ, Адыгэ къэралыгъо телерадиокомпанием икорреспондентэу Елена Юсеф. Сыхьати 3-рэ такъикъ 43-рэ пресс-конференциер кIуагъэ, упчIэ 60-м ехъу къэралыгъом ипащэ ратыгъ.

ХЪУТ Нэфсэт.