ЯцIыфыгъэ къыхигъэщыгъ

Гъогу-патруль къулыкъум иинспекторхэм гулъытэ инэу къахэфагъэр ыкIи игъом IэпыIэгъу зэрафэхъугъэхэр къызщиIорэ рэзэныгъэ тхылъэу Краснодар краим къикIыгъэр республикэм и Къэралыгъо автоинспекцие къыIукIагъ. Ар къэзытхыгъэр Вячеслав Пуповыр ары.

Ащ къызэритхыгъэмкIэ, щылэ мазэм и 21-м Адыгеим къикIыжьэу ядэжь къэкIожьызэ, автогъогоу «Мыекъуапэ — Лэбапэ» зыфиIорэм ия 18-рэ километрэ имашинэ щэрэхъ зэщыкъонэу хъугъэ. Ар псынкIэу пшIыжьышъунэу зэрэщымытыр къызелъэгъум, къэгумэкIыгъ. Сыда пIомэ иунагъоу къыдисыгъэр чэщым машинэ чъыIэм къинэным ищынагъо щыIагъ.

А уахътэм тефэу гъогу-патруль къулыкъум иротэу N 1-м истаршэ лейтенантхэу ХъокIо Вячеславрэ МэщфэшIу Казбекрэ гъогубгъум щыт машинэм гу лъати, къекIолIагъэх. Водителым IэпыIэгъу ищыкIагъэмэ ахэр кIэупчIагъэх. Техническэу машинэр зэрэзэщыкъуагъэм къыхэкIэу зекIон зэримылъэкIырэр ыкIи ишъхьэгъусэрэ исабыйхэмрэ зэригъусэхэр Пуповым ариIуагъ.

Полицием икъулыкъушIэхэм ищыкIэгъэ Iэмэ-псымэхэр къаштэхи, гузэжъогъу хэфэгъэ водителым ищэрэхъ ышIыжьынымкIэ IэпыIэгъу фэхъугъэх.

Типолицейскэхэм къахэфэгъэ зекIуакIэм ишIуагъэкIэ ежьыри иунагъуи а пчыхьэм яунэ екIолIэжьынхэ зэралъэкIыгъэр, лъэшэу зэрафэразэр Вячеслав Пуповым итхыгъэ къыщыриIотыкIыгъ.