ЯтIонэрэ чIыпIэ къыдихыгъ

НыбжьыкIэхэм зэхагъэуцогъэ проектхэр къызэрахьылIэрэ Урысые зэнэкъокъоу «Моя страна — моя Россия» зыфиIорэм изэфэхьысыжь уцугъо мэкъуогъум и 13-м къыщегъэжьагъэу и 15-м нэс Москва щыкIуагъ.

glavnaja(534)

Мыекъопэ къэралыгъо технологическэ университетым истудентэу Артем Тойлыевым Адыгэ Республикэр ащ къыщигъэлъэ­гъуагъ. Урысые чIыпIэ зы­гъэIорышIэжьыпIэм хэ­хъо­ныгъэхэр ышIынхэм фытегъэпсыхьэгъэ проектэу «Интерактивная модель управления муниципалитетом» зыфиIорэр ары ащ зигугъу къышIыгъэр.

2016-рэ илъэсым фе­деральнэ уцугъоу зэнэкъо­къум иIагъэм IофшIэгъэ 287-рэ къырахьылIагъ. Ар­тем Тойлыевым ащ ятIо­нэрэ чIыпIэ къыщыдихыгъ. ФедерациемкIэ Советым федеративнэ гъэпсынымкIэ, шъолъыр политикэм­кIэ, чIыпIэ зыгъэIоры­шIэ­жьынымкIэ ыкIи Темырым иIофыгъохэмкIэ и Комитет итхьаматэу Д. И. Азаровым Дипломрэ шIу­хьаф­тын лъапIэхэмрэ къыфи­гъэшъошагъэх.

— Муниципальнэ образованием исайт зыкI «Мой город» зыфиIорэ лъэны­къоу Артем къы­гъэхьазы­рыгъэмкIэ портал къыщы­зэIуихын гухэлъ иI. Ащ ишIуагъэкIэ къалэм щы­псэурэ цIыфхэм япсэупIэ нахьышIу шIыгъэным фэ­гъэхьыгъэ предложениеу яIэ­хэр къыраIотыкIынхэ, гумэкIыгъоу щыIэхэр ащ щызэхафынхэ алъэкIыщт. Мыщ фэдэу электроннэ шIыкIэм тетэу зэрэгъэпсы­гъэм къыхэкIэу, гумэкIы­гъохэм ядэгъэзыжьын къа­лэм щыщхэр, анахь мэхьанэ зэттыхэрэр — ныб­жьыкIэхэр къыхэлэжьэнхэ алъэкIыщт, — къыщаIуагъ Адыгэ Республикэм гъэсэныгъэмрэ шIэныгъэм­рэкIэ и Министерствэ.

«Моя страна — моя Россия» зыфиIорэ зэнэ­къо­къур зызэхащэрэ илъэс 13-м къыкIоцI нэбгырэ мин 40-м ехъу хэлэжьагъ. 2016-рэ илъэсым IофшIэгъэ мини 5-м нахьыбэ къы­рахьылIагъ. Къэралы­гъом ишъолъырхэм ащыщхэм къащагъэхьазырыгъэ проект 1426-рэ федеральнэ экспертизэм ­къыхихыгъэх.

Урысыем ичIыпIэхэм гу­мэкIыгъо шъхьаIэу яIэ­хэм ныбжьыкIэхэр ащагъэгъо­зэнхэр, ахэм язэшIохын къыхагъэлэжьэнхэр зэнэкъокъум ипшъэрылъых. УФ-м гъэсэныгъэмрэ шIэ­ныгъэмрэкIэ и Министерствэ, Общественнэ объ­единениехэм ясоюзэу «Ныб­жьыкIэ социальнэ-экономическэ гухэлъхэр» зыфиIорэр Iофтхьабзэм кIэщакIо фэхъугъэх. Ти­шъолъыркIэ Адыгэ Республикэм гъэсэныгъэмрэ шIэныгъэмрэкIэ и Министерствэ ар зэхищагъ.

(Тикорр.).