ЯкъыхэхыкIэ зэблахъугъ

Дунэе кIэлэцIыкIу гупчэу «Артекым» автоматизированнэ информационнэ системэу «Путевка» зы­фиIорэр щыгъэпсыгъэ хъугъэ. Ащ ишIуагъэкIэ, кIэлэцIыкIухэм а гъэсэныгъэ учреждением квотэкIэ (бюджет мылъкукIэ) агъэкIощтхэм якъыхэхын зэхъокIыныгъэ фэ­хъугъ.

Адыгэ Республикэм IофшIэнымкIэ ыкIи социальнэ хэхъоныгъэмкIэ и Министерствэ ипресс-къулыкъу къызэри­тырэмкIэ, «Артекым» ибюджет чIыпIэ­хэр тапэкIэ зэрагощыщтхэр а системэм епхыгъэщт.

Илъэс еджэгъум «Артекым» джы кIонхэ зылъэкIыщтхэр я 5 — 11-рэ классхэм арысхэу муниципальнэ, чIыпIэ, урысые зэнэкъокъухэм, олимпиадэхэм аужырэ илъэсищым текIоныгъэ къащыдэзыхыгъэхэр ары. КIэлэеджакIом е ащ илIыкIо сайтэу «артек.дети» зыфи­Iорэм ихьанышъ, «Артекым» кIонэу, ащ исменэ горэм хэфэнэу зэрэфаемкIэ «зыщитхын» фае. Ащ пае кIэлэцIыкIу пэпчъ е ащ янэ-ятэхэм «унэе кабинет» а сайтым щыряIэн фае ежь ехьылIэгъэ къэбарыр зэкIэ (дипломэу, щытхъу тхылъэу, свидетельствэу, сертификатэу, рэзэныгъэ тхылъэу, нэмыкIэу иIэхэр) ригъэхьаным фэшI. ШъунаIэ тешъудз а зэнэкъокъум ухэлэжьэным фэшI лъэIу тхылъыр автоматизированнэ системэмкIэ зыптыщт уахътэр гъэнэфагъэу зэрэщытым.

Автоматизированнэ системэу АИС «Путевка» зыфиIорэм нэIуасэ зыфэшъу­шIэу, упчIэ горэхэр шъуиIэхэ хъумэ, адресэу ais=putevka@artek.org-мкIэ джэ­уапхэр жъугъотыщтхэу пресс-къулыкъум къыхегъэщы.

Кандидатхэм ярейтинг изэфэхьысыжьхэр автоматизированнэ системэм зишIыхэрэм ыуж АР-м IофшIэнымкIэ ыкIи социальнэ хэхъоныгъэмкIэ и Мини­стерствэ щызэхэщэгъэ IофышIэ купым документхэр зэрагъэхьазырыгъэхэр ыуплъэкIунхэшъ, «Артекым» кIэлэцIыкIур гъэкIогъэным фэгъэхьыгъэ унашъо ышIыщт.

(Тикорр.).