Язытет ауплъэкIу

Мыекъуапэ дэт гурыт еджапIэхэр илъэсыкIэ еджэгъум зэрэфэхьазырхэр Адыгеим иполицейскэхэм ауплъэкIух.

ХэбзэухъумэкIо органхэм якъулыкъушIэхэм хэгъэгу кIоцI IофхэмкIэ Министерствэм и Общественнэ совет илIыкIохэр ягъусэхэу гъэсэныгъэм иучреждениехэр къаплъыхьэх.

УхъумэгъэнымкIэ сигнализацием, видеолъыплъэным исистемэ язытет, еджэпIэ щагур къызэрэшIыхьагъэм анахьэу анаIэ атырагъэты. ЫпэкIэ хэукъоныгъэу къыхагъэщыгъагъэхэр зэрэдагъэзыжьыгъэхэм лъыплъэнхэ амали мыщ фэдэ уплъэкIунхэм къаты.

Адыгэ Республикэм хэгъэгу кIоцI IофхэмкIэ и Министерствэ ипресс-къулыкъу къызэритыгъэмкIэ, общественностыр мы Iофыгъом чанэу къыхэлэжьэн ыкIи ищыкIэгъэ IэпыIэгъур еджапIэм иадминистрацие ригъэкIын фае.

Апэ уплъэкIуныр къутырэу Гавердовскэм дэт гурыт еджапIэу N 18-м щыкIуагъ. АшIэгъэ IофшIэныр, тапэкIэ джыри къэнагъэр игъэкIотыгъэу еджапIэм иадминистрацие общественникхэм къафаIотагъ.

Iоныгъом и 1-р къэблагъэ зыхъукIэ, хэбзэухъумакIохэм яIофшIэн гъэлъэшыгъэ шIыкIэм тырагъэхьащт. ЕджапIэ пэпчъ къагъэгъунэщт. Джащ фэдэу гъогурыкIоныр щынэгъончъэным фэшI гъэсэныгъэм иучреждениехэм ягъунэгъоу автоинспекцием къулыкъур щихьыщт.

(Тикорр.).