ЯгумэкIыгъохэр къыфагъэзагъэх

УФ-м и Президент пшъэрылъ къызэрэфишIыгъэу, Адыгэ Республикэм и ЛIышъхьэу КъумпIыл Мурат тыгъуасэ цIыфхэр ыдэжь ригъэблэгъагъэх, ахэм гумэкIыгъоу яIэхэм защигъэгъозагъ.  Iофтхьабзэм  хэлэжьагъэх федеральнэ инспектор шъхьаIэу Сергей Дрокиныр, АР-м ипрокурорэу Марк Большедворскэр, АР-м и ЛIышъхьэрэ министрэхэм я Кабинетрэ я Администрацие ипащэу ТхьакIущынэ Мурат. 

ПсэупIэу Ханскэм щашIырэ кIэлэцIыкIу IыгъыпIэм, фэтэрыбэу зэхэт унэу Мыекъуапэ дэтхэм ящагухэр гъэкIэжьыгъэнхэм, Красногвардейскэ районым ит паркым гъэцэкIэжьын IофшIэнхэр ща­шIэнхэм ыкIи нэмыкI Iофыгъохэм ахэплъагъэх.

ЦIыфхэр зыгъэгумэкIырэ Iофыгъохэм ялъытыгъэу унэшъо гъэнэфагъэхэр муниципалитетхэм япащэхэм КъумпIыл Мурат афишIыгъэх. ГумэкIыгъоу къызэреолIагъэхэр дэгъэзыжьыгъэхэ хъуным фэшI район администрациехэм япащэхэм мылъкур къызыдахыщтым ыкIи уахътэу зэрэзэшIуахын фаем афэгъэхьыгъэ пшъэрылъхэр афишIыгъэх. Къызэрагъэ­нэфагъэмкIэ, Iофыгъоу республикэм ипащэ къыфагъэзагъэхэм ащыщхэр джырэ уахътэм зэхафых.
Республикэм щыпсэухэрэм ягумэкIыгъохэм защыгъэгъозэгъэным мэхьанэшхо зэриIэр КъумпIыл Мурат къыхигъэ­щыгъ, муниципалитетхэм япащэхэм ахэм анаIэ атырагъэтынэу къяджагъ.

— ЧIыпIэхэм ащыIэ хэбзэ къулыкъу­хэм пшъэрылъ шъхьаIэу яIэр обществэм зэпхыныгъэ дыряIэныр, цIыфхэм мафэ къэс гущыIэгъу афэхъунхэр ары, — къы­Iуагъ КъумпIыл Мурат. — НахьыбэрэмкIэ, ахэм гумэкIыгъоу псэупIэм щыIэр нахь ашIэ, щыгъуазэх. Нэужым кIэухэу тиIэн фаер, псынкIэу Iофыгъор зэрэзэшIотхырэм дакIоу, псэупIэхэм хэхъоныгъэхэр ашIынхэм тыфэкIоныр ары. АщкIэ къэралыгъо программэхэр дгъэфедэщтых.

ЦIыфэу къекIолIагъэхэм гущыIэгъу афэхъузэ, псауныгъэр къэухъугъэмэным­кIэ, гъэсэныгъэмкIэ, культурэмкIэ къу­лыкъу­хэр зэрэзэхэщагъэхэм, нэмыкI лъэ­ныкъохэм еплъыкIэу афыряIэм Къум­пIыл Мурат зыщигъэгъозагъ. Нэужым муниципальнэ образованиехэм япащэхэм унэшъо гъэнэфагъэхэр афишIыгъэх.

Гъонэжьыкъо Сэтэнай.