Ыгъэхъужьынхэр ипшъэрылъ шъхьаI

ПсышIуапэ апэрэ къэлэ сы­мэджэщэу дэтым иврач Iазэу Нэгъуцу Мыхьамодэ ышIошъ мэхъу цIыфым къыхихыщт сэнэхьатыр «ынатIэ итхагъэу» къызэрэхъурэр.

— Медицинэм зыфэзгъэзэнэу къызкIыхэсхыгъэр сшIэрэп, — къеIуатэ Мыхьамодэ. — Ти­унагъо врач исыгъэп, тянэ-тя­тэхэр мэкъу-мэщым пылъыгъэх. Сшыхэм шIэныгъэм зы­ратыгъ. Уврачыныр зэрэмы­псынкIагъор къызгурыIощтыгъ. Анахьэу гум уеIэзэныр къин. Ау къинхэм сыкъагъэщынэ­щтыгъэп, джары сисэнэхьат къызкIыхэсхыгъэри.

Краснодар дэт медицинэ апшъэрэ еджапIэм IэзэнымкIэ ифакультет къызеухым, Мы­хьа­модэ IофшIэныр Мыекъуапэ щы­ригъэжьэгъагъ. Илъэс текIыгъэу ар дзэ къулыкъум дащыгъагъ, ау ишIэныгъэхэр зыщигъэ­федэнхэ чIыпIэ ифи, дзэ ча­стым илазарет ипащэу агъэ­нэфэгъагъ. Частыр Москва пэмычыжьэу, къалэу Коломна дэтыгъ.

Нэужым специалист ныб­жьыкIэм IофшIэнымкIэ итхылъ Орджоникидзэм ыцIэ зыхьырэ санаториеу Шъачэ дэтым кар­дио­логиемкIэ иотделение ипащэу илъэ­сиплIэ Iоф зэришIагъэр къыфыдатхэщт.

ЦIыфхэм амал-шIыкIэхэу узэ­ряIэзэщтхэр къызIэкIигъэхьа­гъэхэу етIанэ ащ апэрэ ПсышIопэ къэлэ сымэджэщым къегъэзэжьышъ, зэпымыоу илъэсыбэрэ Iоф щешIэ.

Илъэс зэкIэлъыкIохэм Мы­хьамодэ ишIуагъэ зэригъэкIыгъэхэ цIыфхэр зэрэхъухэрэр къэлъытэгъуае. Ежьым пытагъи, теубытагъи сыдигъуи хэ­лъых, исэнэхьат гъунэнчъэу фэ­­шъыпкъ. Iоф къыдэзышIэхэрэм шъхьэкIэфагъэ къыфашIы, агъэ­лъапIэ, специалист IэпэIасэр къызэрэуатын щыIэп. — Сызхэт коллективым лъэ­шэу сыфэраз, — еIо ежьыми. — Сыкъызахэхьагъэм къыщегъэжьагъэу зышъхьамысыжьхэу къатефэрэр зэра­шIэрэр сэ­лъэгъу, профессио­налых.

Я 90-рэ илъэсхэм лъэхъаныр къиныгъ. Тызэсэгъэ псэукIэр къызэхъокIыгъагъ, тапэкIэ къи­кIыщтым, неущ къэхъущтым цIыфхэр егупшысэщтыгъэхэп. Джащыгъум Мыхьамодэ ишIэныгъи исэнаущыгъи рихьы-лIэхи, охътэ кIэкIыкIэ кардио­ло­гиемкIэ отделение къызэIуи­хыгъагъ. Илъэс 40-м ехъурэ от­де­лением Iоф щызышIэгъэ бзы­лъ­фыгъэу Мэри Ивановам къе­Iуатэ: — Дэпкъ закъохэр арых ащыгъум щытыгъэхэр. 1991-рэ илъэсым сымэджэщым щыщэу апэрэ блокым ишIын къызаухым инэу тыгушIогъагъ. Мыхьамодэ кардио­логиемкIэ отделение тимыIэмэ зэрэмы­хъущтыр, цIыфхэм ар ящыкIэгъэ шъыпкъэу зэрэщытыр къыдгуригъэIогъагъ. Цыпэ-цыпэу ти­щыкIэгъэ пстэур зэдгъэгъотыгъэ, цIыфэу Iоф щызышIэщтхэр отделением къаштагъэх, ахэр ягуапэу Мыхьамодэ ыдэжь къакIощтыгъэх.

Ар зэхэщэкIо IэпэIас. МылъкукIэ къыддеIэщтхэри, IэпыIэ­гъукIэ къытфэгумэкIыщтхэри къыгъотыщтыгъэх. Ахэм инэу яшIуагъэ къытэкIыгъ. — Iоф къыздэзышIэхэрэм къызэрэздырагъаштэрэм кIуачIэ къыситызэ сыпсэугъ. СэркIэ ащ мэхьанэ иI, инэуи сы­рэгу­шхо. Коллективыр къызэ­рэпкъо­тыр пшIэ хъумэ, ахэм, отделением ыкIи сымэ­джэщым апае пшъэдэкIыжь пхьынэу мэхъу.

Мыхьамодэ нэмыкI IофшIа­пIэхэм зэп зэрарагъэблэ­гъа­гъэр, ау ежь зыIут сымэджэ-
щыр къычIидзынышъ, нахь зэтегъэпсыхьагъэм кIонэу зыкIи ышъхьэ къихьагъэп. Арэущтэу зэрэхъугъэм непэ кIэгушIужьы ыкIи егъэгу­шхо.

Нэгъуцу Мыхьамодэ къалэу ШъачэкIэ «Анахь кардиолог дэгъур» зыфиIорэ цIэр иI, илъэ­сыбэрэ хьалэлэу Iоф зэришIагъэм пае муниципалитетым псауныгъэр къэухъумэгъэнымкIэ игъэIорышIапIэ, Краснодар краим псауныгъэр къэу­хъумэгъэнымкIэ и Министерствэ ящытхъу тхылъхэр бэу къыратыгъэх.

Сымэджэщым кардиоло­ги­емкIэ иотделение сыма­джэхэр ренэу зэрэчIэлъхэрэм ар егъэ­гумэкIы.

— ЦIыфхэр япсауныгъэ егупшысэхэу зырагъажьэрэр узым къызыригъэзыхэкIэ ары, — еIо Мыхьамодэ. — Ар къыомыутэкIызэ узфэсакъыжьымэ бэкIэ нахьышIу. Жьы къабзэм ухэтымэ, спортым упылъымэ, шхынхэм уафэсакъымэ яшIуагъэ къэкIощт. Тэ, Шъачэ щы­псэухэрэм, чIыопсым ежь-ежьырэу ыIэ къытфещэи, псауныгъэр къытпегъохы. Iушъумы­гъэкIот ащ ыIэ.

Ныбэ Анзор.