Щытхъур къэзыхьыгъэхэр

Краснодар краим атлетикэ онтэгъумкIэ ишIэжь зэIукIэгъухэр псэупIэу Псыкъо щыкIуагъэх.СССР-м, РСФСР-м язаслу­женнэ тренерэу Ю. Саркисянрэ Урысыем изаслуженнэ тренерэу В. Соколовымрэ шIэжь зэ­нэкъокъур афэгъэхьыгъагъ.
Илъэс 13 — 15 зыныбжь кIа­лэхэр, пшъашъэхэр зэIукIэгъухэм ахэлэжьэнхэмкIэ куп шъхьаф хэ­тыгъэх. Нахьыжъхэр нэмыкI купым щызэнэкъокъугъэх. Адыге­им испортсменхэм тагъэгушIуагъ.
Елизавета Толмачевам, кг 76-рэ, тренерыр В. Дранев, апэрэ чIыпIэр къыдихыгъ. Антон Шу­маковми, кг 49-рэ, текIоныгъэр къыдихыгъ, тренерыр Сихъу Ас­лъан. Давид Саядян, кг 61-рэ, ятIонэрэ хъугъэ, пащэр Сихъу Аслъан. ПкIыхьакIэ Амир, кг
61-рэ, джэрзыр къыфагъэшъо­шагъ, тренерыр Чэмбэхъу Анзор, Джамбэчые щыщых.
Хьагъур Ислъам, кг 73-рэ, апэрэ чIыпIэр къыдихыгъ, тренерхэр Роман Казаков, Александр Горлов. Нарт шъаом Инэм зыщегъасэ. Вячеслав Панкра­товым, кг 61-рэ, Инэм зыщегъасэ, илъэс 16-м ит, тренерыр Александр Горлов. Батырым апэрэ чIыпIэр къыдихыгъ.
Мыекъуапэ зыщызыгъэсэрэ Павел Еременкэр илъэс 18-м ит, тренерэу Хьакурынэ Руслъан ипащ. Спортсменым ятIонэрэ чIыпIэр къыдихыгъ. Сихъу Аслъан ыгъэсэрэ Михаил Федотоври Мыекъуапэ щыщ. Килограмм
61-м нэс къэзыщэчыхэрэм якуп М. Федотовым ящэнэрэ чIыпIэр къыщыдихыгъ. Хьалъэкъо Долэтбый, кг 102-рэ, Хьатыгъужъы­къуае щыщ, ятIонэрэ хъугъэ, тренерыр Хьагъур Хьалим. Хьабый Хъусен, кг 81-рэ, илъэс 17-м ит, апэрэ чIыпIэр къыдихыгъ. Нарт шъаор Хьатыгъужъыкъуае щагъасэ, тренерыр Хьагъур Хьалим.
Артем Горловыр, кг 81-рэ, Инэм щыщ, илъэс 16-м ит, ятIо­нэрэ чIыпIэр къыдихыгъ. Тренер­хэу Роман Казаковымрэ Александр Горловымрэ ипащэх. Гор Тертерян, кг 67-рэ, илъэс 16-м ит, апэрэ чIыпIэр къыфагъэшъошагъ, тренерыр Роман Казаков.
— Нэбгырэ 250-м нахьыбэ зэнэкъокъум хэлэжьагъ, командэ 12 хъущтыгъэх, — къытиIуагъ Адыгэ Республикэм атлетикэ онтэгъумкIэ испорт еджапIэ ипащэу, спортымкIэ дунэе класс зиIэ мастерэу Сихъу Рэмэзан. — ­Илъэс 13 — 15 зыныбжьхэм язэ­нэкъокъу Адыгэ Республикэм икомандэ апэрэ чIыпIэр къы­щыдихыгъ. Краснодар ятIонэрэ хъугъэ, Псыфабэ (Горячий Ключ) ящэнэрэ чIыпIэр къыдихыгъ. На­хьыжъхэр зыхэт купым Псыфабэ ибатырхэм апэрэ чIыпIэр афа­гъэшъошагъ. Адыгэ Респуб­ликэм ятIонэрэ, Краснодар ящэнэрэ чIыпIэхэр къыдахыгъэх.
Сурэтым итхэр: килограмм 81-м нэс къэзыщэчыхэрэм якуп хагъэунэфыкIырэ чIыпIэхэр къыщыдэзыхыгъэхэр. Хъ. Хьабыим апэрэ чIыпIэр къыфа­гъэшъошагъ.

НэкIубгъор зыгъэхьазырыгъэр ЕМТIылъ Нурбый.