Щытхъур Будапешт къыщахьыгъ

Художественнэ гимнастикэмкIэ Дунэе зэIукIэгъоу Венгрием икъалэу Будапешт щыкIуагъэм къэралыгъо 16 хэлэжьагъ.

Италием, Израиль, Польшэм, Хорватием, Урысыем, нэмыкIхэм якомандэхэм яIэпэIэсэныгъэ къагъэлъэгъуагъ. Адыгэ Республикэм икIэлэцIыкIухэмрэ ныбжьыкIэхэмрэ Урысыем ыцIэкIэ Буда­пешт зэкIохэм, медаль 12 зэIукIэгъухэм къащыдахыгъ.

2015-рэ илъэсым Мыекъуапэ испорт еджапIэу N 2-м художественнэ гимнастикэмкIэ къутамэ къыщызэIуахыгъ. Урысыем спортымкIэ имастерэу Яна Цеханович кIэлэцIыкIу купхэм пащэ ­афашIыгъ. Адыгэ Республикэм художественнэ гимнастикэмкIэ и Федерацие зызэхащэм, Я. Цеханович тхьаматэу хадзыгъ. Къош Людмилэ, Къасимэ Сабинэ, нэмыкIхэри IэпыIэгъу къыфэхъухэзэ, ­кIэлэцIыкIу­хэр агъасэх.

— Будапешт дышъэ медали 6, тыжьыни 3, джэрзи 3 тиеджакIохэм къыщыдахыгъэх, — къе­Iуатэ Яна Цеханович. — Милена Капковам, Милана Матевосян, нэмыкIхэм дышъэ медальхэр къафагъэшъошагъэх.

Джырэблагъэ Адыгэ Республикэм художественнэ гимнастикэмкIэ изэIухыгъэ зэнэкъокъоу Мые­къуапэ щыкIуагъэм Москва, Ростов-на-Дону, Краснодар, фэшъхьафхэм къарыкIыгъэхэр чанэу хэлэжьагъэх. Адыгеим щыщ пшъэшъэжъыехэу апэрэ чIыпIэхэр къэзыхьыгъэхэр республикэм ихэшыпыкIыгъэ командэ хагъахьэхи, Венгрием яIэпэIэсэныгъэ щауплъэкIугъ.

— ТикIэлэцIыкIухэр художественнэ гимнастикэм хэгъозагъэхэп. Агу етыгъэу Iоф зыдашIэжьышъ, ащ тегъэгушхо. Спортышхом цIэрыIо щыхъунхэ алъэкIыщтэу сэгугъэ, — зэдэгущыIэгъур лъегъэкIуа­тэ Яна Цеханович. – Ны-тыхэм сафэраз. ­IэпыIэгъу къытфэхъух, тызэупчIыжьы.

Къош Аминэ пшъэшъэжъые нэгушIу, художественнэ гимнастикэм, адыгэ къашъохэм зафегъасэ. Будапешт ятIонэрэ чIыпIэр къызэрэщыдихыгъэм фэшI мэгушIо, ау дышъэ медалым пэблагъэ зэрэхъу­гъагъэр щыгъупшэрэп.

Спорт Унэшхоу Кобл Якъубэ ыцIэ зыхьырэм художественнэ гимнастикэмкIэ кIэлэеджакIохэм зыщагъасэ. Мыекъуапэ иадминистрацие физкультурэмкIэ ыкIи спортымкIэ и Комитет итхьаматэу Дмитрий Щербаневыр тренерхэм, кIэлэеджакIохэм афэгушIуагъ. Дунэе, хэгъэгу зэнэкъокъухэм спорт­сменхэр нахьыбэрэ ахэлэжьэнхэм фэшI унашъохэр рихъухьагъэх.

— Художественнэ гимнастикэм пкъыр епсыхьэ, псауныгъэр егъэпытэ, — къеIуатэ Дмитрий Щербаневым. – Яна Цеханович тренер дэгъу. Спорт Унэшхор итеплъэкIэ дахэ, цIыфхэм якIуапIэ зэрэхъу­гъэм тыкъыпкъырыкIызэ, нэмыкI спорт лъэпкъхэмкIи зэнэкъокъухэр зэхэтщэщтых.

Сурэтым итхэр: художественнэ гимнастикэм зыфэзыгъасэхэрэр; Будапешт щыIагъэхэр.