Щынагъо щыIа?

Аужырэ мафэхэм къэбархэр бэу къекIокIых Пшызэ псыIыгъыпIэр къиун ылъэкIыщтэу. Краснодар краим иадминистрацие ошIэ-дэмышIэ Iофхэр къэмыгъэхъугъэнхэмкIэ ыкIи ахэр дэгъэзыжьыгъэнхэмкIэ икомиссие зэхэсыгъо иIагъ. Псыхъохэм ыкIи псыIыгъыпIэхэм язытет ащ щытегущыIагъэх. Краснодар краим игубернатор игуадзэу Андрей Алексеенкэм зэхэсыгъор зэрищагъ. Пшызэ псыIыгъыпIэм изытет зигугъу ашIыгъэхэм ащыщ.

Пстэумэ апэу къэIогъэн фае — Пшызэ псыIыгъыпIэм изытет ылъэныкъокIэ щынагъо щыIэп. Зэхэсыгъом ар теубытагъэу къыщаIуагъ. Аужырэ мафэхэм псыIыгъыпIэм фэгъэхьыгъэу къэбарыбэ къекIокIы. Ау ащ псэу дэтыр дэмыфэжьэу, къиун ылъэкIыщтэу цIыфхэр зэрагъэщынэхэрэм лъапсэ иIэп. Мы IыгъыпIэр псыр щаугъоиным, игъорыгъоу дагъэчъыным ыкIи щынагъо къэмыхъуным тегъэпсыхьагъэу ашIыгъагъ.

Пшызэ шъолъыр бассейнхэмкIэ ыкIи псыхэмкIэ игъэIорышIапIэ ипащэу Геннадий Саловым зэхэсыгъом къыщиIуагъ:

— Непэрэ мафэм псыIыгъыпIэм зыпкъ итэу Iоф ешIэ. Джыри псы кубическэ метрэ миллион 665-рэ фэдиз дэфэщт. — Непэрэ мафэм псыIыгъыпIэм зыпкъ итэу Iоф ешIэ. Джыри псы кубическэ метрэ миллион 665-рэ фэдиз дэфэщт. Псыр нахь къызщыдэкIоегъэ лъэхъаныр къызэтынэкIыгъ.

Сурэтхэри ащ ишыхьатэу зэхэсыгъом къыщагъэлъэгъуагъэх. Пшызэ псыIыгъыпIэм псэу дэтыр щынэгъо пчъагъэхэм 1980-рэ илъэсым анэсыгъагъ. Ащ псыр лъыIэсыным пае сантиметри 160-м ехъу джыри иI.

Псыхъоу псыIыгъыпIэм къыхэлъэдэжьхэрэм язытети зэхэсыгъом игугъу щашIыгъ. Гъэлъэшыгъэ шIыкIэм тетэу ахэм краим ащылъэплъэх.

— ЖъоныгъуакIэм и 19-м къыщегъэжьагъэу Темыр Кавказым ощхышхо къыщещхы, — къыIуагъ граждан ухъумэнымкIэ ыкIи ошIэ-дэмышIэ IофхэмкIэ Краснодар краим иминистрэ игуадзэу Сергей Капустиным. — Краснодар краими, Адыгеими ом изэхъокIыныгъэхэр къалъыIэсыгъэх. Гъэлъэшыгъэу къулыкъу тэхьы. Ом изытет ошIэ-дэмышIэу къызэIыхьан ылъэкIыщт. Ау Iофхэр нахь зыпкъ иуцожьыгъэх, псыхъо инхэу Пшызэ, Лабэ ягугъу пшIын зыхъукIэ, щынэгъо шапхъэхэм анахь макI псэу адэтыр, япсыкIуапIэхэм къашъхьадэкIыхэрэп.

Джащ фэдэу, Сергей Капустиным къызэриIуагъэмкIэ, Ставрополь краим къикIырэ псыр къытлъэIэсы, ар Пшызэ псыIыгъыпIэм хэлъэдэжьы. Ащ ыпкъ къикIэу ыпэрэ мафэхэм псыр нахь лъэшэу дагъэчъынэу унашъо ашIыгъагъ.

— ДжырэкIэ зы нэгъэупIэпIэгъум псы кубическэ метрэ 1200-м нэсэу псыIыгъыпIэм дэтэгъэчъы, — къытиIуагъ министрэм игуадзэ, — типсыIыгъыпIэкIэ ар бэ, ау шапхъэу щыт. Пшызэ ыхэкIэ щыIэ псэупIэхэм талъэплъэ. Пшызэ псыIыгъыпIэм изытет джырэкIэ щынагъоп. Ар сурэтхэмкIи нэрылъэгъу. ДжырэкIэ псэу ащ дэтыр процент 76-м нэсы. Псы кубометрэ миллион 700 джыри дэфэщтэу аIо. Ащ щылажьэхэрэм къызэраIуагъэмкIэ, аужырэ мафэхэм псым хэкIыгъ нахь, къыхэхъуагъэп. ГущыIэм пае, тыгъоснахьыпэ сантиметри 3 — 4-кIэ зэкIэкIуагъ.

Шъыпкъэ, джыри мэфи 10 къещхыщтэу синоптикхэм къаты, гъэлъэшыгъэ ухьазырыныгъэм зэкIэри тет. Ом изытет къыздихьыщтыр къэшIэгъуай, ау Пшызэ псыIыгъыпIэу зэкIэ ащ кIэрыс къуаджэхэр зытещыныхьэхэрэм джыри псыбэ дэфэщт.

ГЪУКIЭЛI Сусан.

Сурэтыр Пшызэ псы гъэIорышIапIэм исайт къитхыгъ.