ШIэхэу атIупщыщт

Адыгеим жьыкIэ электроэнергие къы­зэрэщашIыщтым зыщыфежьагъэхэр икIыгъэ илъэсыр ары. ЯпчъагъэкIэ 60 хъоу Шэуджэн ыкIи Джэджэ районхэм ащ тегъэпсыхьэгъэ пкъыгъошхохэр ащагъэуцугъахэх.


БлэкIыгъэ илъэсым ибжыхьэ ощхы­шхоу къытфещхыгъэхэм язэрар къэмыкIогъагъэмэ, жьыбгъэ паркым ишIын нахьыжьэу къаухыщтыгъ. Паркым Iоф­шIэныр зыригъажьэкIэ, тишъолъыр щагъэфедэрэ энергием ипроцент 20 фэдизыр ащ къытынэу щэгугъых.

Мы мафэхэм Главгосэкспертизэм икъутамэу Ростов щыIэм къызэриIуагъэм­кIэ, зынахь ин къэралыгъом имыт жьыбгъэ паркым къытырэ энергиер шIэхэу агъэфедэу рагъэжьэщт, Урысые Федерацием и Къыблэ шъолъыр ит субъект­хэм зэкIэми электроэнергиеу аIэкIахьэ­рэм къыхэхъощт.

Ахэм ащыщ Армавири. Урысыем и Глав­госэкспертизэ макъэ къы­зэри­гъэIугъэмкIэ, къалэм екIолIэрэ гъу­чIычхэу электро­энергиер зэрыкIощтхэр агъэкIэжьынхэу фитыныгъэ къаритыгъ. Электросетим изэтегъэпсыхьан шIэхэу фежьэщтых.

Илъэсым ыкIэ нэс электросетьхэр жьыбгъэ паркым пашIэщтых. Ащ игъэп­сын сомэ миллиарди 10-м ехъу пэIуагъэ­хьагъ. Адыгеим жьыбгъэ паркыр зэрэщагъэпсыгъэ шIыкIэр нэмыкI чIыпIэхэу жьым икъарыу зыщагъэфедэщтхэм щысэ афэхъущт. КъэкIорэ илъэсым Краснодар крайми жьыбгъэ парк щашIыщт.

Адыгеим щагъэ­уцугъэ жьыбгъэ электростанциер УрысыемкIэ апэрэ проектэу хъугъэ. Электро­энергиер тишъолъыр къыщашIэу зырагъажьэкIэ, нэмыкI шъо­лъырхэм къащащэфызэ къытфатIупщырэм къыщыкIэщт.

Гъогу кIыхьэ къыкIузэ электричествэр тиунэхэм къанэсы. Ау тичIыгу къыща­шIыщт энергием ыуасэ зыфэдизыщтым джыри зыми игугъу къышIырэп.