Шэпхъэ гъэнэфагъэхэм атехьагъэх

Муниципальнэ образованиеу «Мыекъопэ районым» иадминистрацие ышIыгъэ унашъом диштэу машIом зыкъымы­штэ­нымкIэ режим гъэнэфагъэ мы районым шэкIогъум и 14-м къыщегъэжьагъэу щагъэуцугъ.

Ащ фэгъэхьыгъэу макъэ къы­гъэIугъ Урысыем и МЧС Адыгэ РеспубликэмкIэ и Гъэ­IорышIэпIэ шъхьаIэ ипащэ игуа­дзэу, зигугъу къэтшIыгъэ гъэ­IорышIапIэм уплъэкIун Iоф­хэмкIэ ыкIи пэшIорыгъэшъ Iофтхьабзэхэр зехьэгъэнхэмкIэ игъэ­IорышIапIэ ипащэу Андрей Ко­лесник.

Ащ къызэрэзэхифыгъэмкIэ, режим гъэнэфагъэм техьанхэр къызхэкIыгъэр джырэ лъэхъаным дунаир нахь къызэрэфабэрэр, машIом Адыгэ Респуб­ликэм игупчэ, икъыблэ лъэ­ныкъохэм закъыщиштэным ищы­­нэгъошхо зэрашъхьарытыр, къызэремыщхырэр, уцыжъхэм къазэракIанэрэм ыпкъ къикIыкIэ къоджэ псэупIэхэм тхьамыкIагъоу къащыхъу­хэрэм зэра­хэхъуагъэр, мэзхэм къазэра­кIанэрэр ары.

Режим гъэнэфагъэм диштэу машIом зыкъымыштэнымкIэ амал тедзэу зэрахьащтхэри агъэнэфагъэх.

«МэшIогъэкIосэ къулыкъухэм, полицием, медицинэ IэпыIэгъу псынкIэм, цIыфхэм якъэгъэнэжьын фэгъэзэгъэ къулыкъухэм яавтомобильхэм анэмыкIхэр джыдэдэм мэзхэм ахэхьан фитхэп; къоджэ псэу­пIэхэм, къэлэ койхэм, чъыгхэтэ лэжьыпIэхэм, мыкоммерческэ дачэ объединениехэм, мэшIоку, автомобиль гъогухэм апэблагъэу машIо щашIы, хэкIыр щагъэсты хъущтэп; тхьамыкIагъо къыздэзыхьын зылъэкIыщт Iоф­шIэнхэр организациехэм агъэцакIэхэ хъущтэп», — къы­Iуагъ республикэ ведомствэм ипащэ игуадзэ.

Андрей Колесник къызэ­рэ­хигъэщыгъэмкIэ, мыгъэ гъогогъу 798-рэ уцыжъхэм къакIэ­нагъэу республикэм щагъэунэ­фыгъ. ТинасыпкIэ машIом псэу­пIэхэм зэрар арихыгъэп, цIыф­хэм япсауныгъи зэщигъэкъуагъэп.

Шэпхъэ гъэнэфагъэхэм зэратехьагъэхэм епхыгъэу адми­нистративнэ пшъэдэкIыжьыр зэрагъэлъэшыгъэми игугъу ведомствэм къышIыгъ.

«Урысые Федерацием и Кодексэу административнэ хэ­бзэукъоныгъэхэм яхьылIагъэм тетэу машIом зыкъымыштэ­нымкIэ шапхъэхэр зыукъорэ цIыфхэм сомэ мини 2-м къыщегъэжьагъэу мини 4-м нэс, IэнатIэхэм аIутхэм — сомэ мин 15-м къыщегъэжьагъэу 30-м нэс, предпринимательхэм — сомэ мин 30-м къыщегъэжьагъэу 40-м нэс, юридическэ ли­цэхэм — сомэ мин 200-м къыщегъэжьагъэу 400-м нэс административнэ тазыр арагъэ­тын алъэкIыщт. МашIом зыкъы­мыштэнымкIэ шапхъэхэм зэ­рарыгъуазэхэрэм яхьылIэгъэ уплъэкIунхэу планым къыдыхэмылъытагъэхэри зэхатщэхэзэ тшIыщт», — къыIуагъ республикэ ведомствэм ипащэ игуадзэ.