ШъхьэкIэфэныгъэр, зэгурыIоныгъэр зыщагъэлъэпIэрэ унагъу

Адыгэ Республикэм и ЛIышъхьэу КъумпIыл Мурат муниципальнэ гъэпсыкIэ зиIэ «Адыгэкъалэ» зыщэIэм мы псэупIэм дэсхэ зэшъхьэгъусэхэу Гъузыекъо Руслъанрэ Альбинэрэ яхьэкIагъ. Республикэм ипащэ игъусагъ Адыгэкъалэ иадминистрацие ипащэу ЛIыхэсэ Махьмудэ.

Пащэхэр зыдэкIуагъэхэ зэшъхьэгъу­сэхэм зэгурыIоныгъэ ыкIи шъхьэкIэфэныгъэ азыфагу илъэу сабыиплI зэдапIу, сыд фэдэрэ лъэныкъокIи щысэ зытепхын, социальнэ-зыпкъитыныгъэ зэрылъ унагъоу щыт. Пшъэшъэ анахьыжъэу Аланэ я 6-рэ классым ис, спортыр, анахьэу есынымрэ волейболымрэ икIасэх. Аминэ я 4-рэ классым щеджэ, кIэлэцIыкIухэм гъэсэныгъэ тедзэ зыщарагъэгъотырэ Гупчэу «ЮТА» зыфиIорэм макIо, художе­ственнэ-прикладной искусствэм фэ­щагъ. Аделинэ кIэлэцIыкIу IыгъыпIэу «Дюймовочка» зыцIэм макIо, ана­хьыкIэ цIыкIоу Аринэ илъэсым ехъу ыныбжь.

Руслъанэ апшъэрэ гъэсэныгъитIу иI, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Прогресс» зыфиIорэм инженер шъхьаIэу Iоф щешIэ. Альбини апшъэрэ гъэсэныгъэ зэригъэгъотыгъ, исэнэхьаткIэ юрист, Теуцожь межрайон хьыкумым икъулыкъушI, джы­дэдэм декрет щыс.

Сабыибэ зэрысхэ унагъохэм IэпыIэгъу афэхъугъэным, ахэм щыIэкIэ-псэукIэ амалхэу яIэхэр нахьышIу шIыгъэнхэм республикэм ипащэ сыдигъуи ынаIэ тет. Муниципалитетхэми, чIыпIэ хэбзэ къулыкъухэми мы лъэныкъом мэхьанэшхо ратын фаеу елъытэ, ащкIэ пшъэрылъ гъэнэфагъэхэр афешIых.

АР-м и ЛIышъхьэ сабыйхэм гущыIэгъу афэхъугъ, зэшъхьэгъусэхэр зыгъэгу­мэкIхэрэ Iофыгъохэм, IэпыIэгъу ящы­кIагъэ­мэ акIэупчIагъ.

ЯкIэлэцIыкIухэр зэрифэшъуашэу пIугъэнхэм, цIыфхэм шъхьэкIэфэныгъэ афашIыным зэшъхьэгъусэхэм анаIэ тет. Унэгъо ныбжьыкIэр хъулъфыгъэм янэ-ятэхэм алъэхэс, унэе псэупIэ яI. Ар кIэлэцIыкIухэмкIэ зэрифэшъуашэу зэтегъэпсыхьагъ.

Гъузыекъо зэшъхьэгъусэхэр къэралыгъо, шъолъыр ыкIи чIыпIэ мэхьанэ зиIэхэ зэнэкъокъу пчъагъэмэ ахэлэжьагъэх. 2009-рэ илъэсым зэхащэгъэ республикэ зэнэкъокъоу «Крепкая семья – крепкая Россия» зыфиIорэм апэрэ чIыпIэр къыщыдихыгъ. Мы илъэс дэдэм Калужскэ хэкум ит къалэу Обнинскэ щырагъэкIокIыгъэ урысые фестивалэу «Вера. Надежда. Любовь» зыфиIорэм Адыгеир къыщагъэ­лъэгъуагъ. Унагъом ятIонэрэ чIыпIэр, ащ епхыгъэу зэхэщакIохэм я Диплом къыфагъэшъошагъэх. Сабыйхэм япIун, унагъом имэхьанэ зыкъегъэIэтыгъэным яIахьышIу зэрэхэлъым къыкIэлъыкIоу Адыгэкъалэ иадминистрацие ирэзэныгъэ тхылъ 2017-рэ илъэсым зэшъхьэгъусэхэм къаратыгъ. Унэгъо ныбжьыкIэхэм псэупIэ ягъэгъотыгъэным фытегъэпсыхьэгъэ про­граммэм игъэцэкIэн къыдыхэлъытагъэу Гъузыекъохэм IэпыIэгъу афэхъугъэх, ащ ишIуагъэкIэ Адыгэкъалэ фэтэр щащэ­фыгъ. Сабыибэ зиIэ унагъом чIыгу Iахь къыратынымкIэ администрацием иучет хэт.

Мыщ фэдэ унагъохэм щысэ атепхын, уарыгушхон зэрэфаер республикэм ипащэ къыIуагъ. Амалэу щыIэмкIэ тапэкIи ахэм афэдэхэм IэпыIэгъу зэрафэхъущтхэр хигъэунэфыкIыгъ.

ТХЬАРКЪОХЪО Адам.