Шъхьэгощэ Iушъо къагъэкIэрэкIагъ

Псыхъоу Шъхьэгуащэ анахь благъэу къалэм къызщекIуалIэрэр Шэуджэн къэлэ цIыкIукIэ заджэхэрэм дэжь. Ар чIыпIэ дахэу, чъыгыбэ къыщыкIэу, зыгъэпсэфыпIэу сыдигъуи щытыгъ.

Ау зэгъэзэфэгъагъэп, тетIысхьэпIэ заулэрэ лъэсгъогоу цIыфхэм пхыратхъугъэмрэ нэмыкI иIагъэп. Арэущтэу щытми, псым къытекIырэ жьы къабзэм, къушъхьэ лъэпэ дахэу ащ ыкIыб щыIэм, чъыгхэм яжьау чъыIэтагъэ цIыфхэр къякIущтыгъэх. Зэрэунагъоу зыщагъэпсэфэу, кушъхьэфачъэкIэ къыщачъыхьэу, ныбжьыкIэхэр щызэхахьэу щытыгъ.

Къэлэдэсхэм шIу алъэгъугъэ чIыпIэр зэтырагъэпсыхьанэу зырагъэжьагъэр бэшIагъэп. Компаниеу «Дорстрой» зыфиIорэм иIофышIэхэр ары мыщ Iоф щызышIэхэрэр. Непэ псыIушъор зыфэдагъэр къэпшIэжьыщтэп. ПлиткэкIэ пкIэгъэ лъэсгъогуищым ащ уращалIэ. ПсыIушъом икIыхьапIэкIэ лъэсрыкIо гъогу шъуамбгъо пхырыщыгъ. ЧIыпIэ-чIыпIэу ащ тетIысхьапIэхэм уязыщэлIэрэ гъогужъыехэр якIуалIэх.

Чъыгхэр зэкIэ зэрэщытыгъэхэм фэдэу къагъэнагъэх. Урамэу Лесноир зыгъэпсэфыпIэ чIыпIэм нахь пэблагъ. ЦIыфэу зыгъэпсэфакIо къакIохэрэм ямашинэхэр зыщагъэуцун чIыпIэ ащ щызэтырагъэпсыхьагъ.

ГъэцэкIэнхэр дэгъоу лъагъэкIотагъэх, къэнэгъэ Iофхэр къэмыучъыIызэ къаухынхэу къаIо. Бригадэм ипащэу Г. Форманян къызэрэтиIуагъэмкIэ, чэщырэ къэблэщт остыгъэхэр шIэхэу къыщагъэуцущтых. Мы уахътэм лъэсрыкIо гъогу гупчэм ыбгъухэм чIышъхьашъор ащызэрагъэзафэ, чIыпIэ оххэр агъэсэих.

Джынэс псыхъо нэпкъым хэти зыщыфаем благъэу екIолIэшъунэу щытыгъ. Ар лъагэми, ныбжьыкIэхэр псым щыхапкIэщтыгъэх, зыщагъэпскIыщтыгъ. Джы гъучI чэу хъагъэ псыIушъом икIыхьапIэкIэ къыIуагъэуцуагъ. Къэнэжьырэр тетIысхьапIэхэр кIэу агъэуцужьынхэр ары.

ЦIыфхэр псыIушъом къэкIох, лъэсгъогу гъушъэхэм ягуапэу къащакIухьэ. IофшIэнхэр зыгъэцакIэхэрэми, къэлэ администрацием ипащэхэми ахэр лъэшэу афэразэх.

ШЪАУКЪО Аслъангуащ.

Сурэтхэр Iэшъынэ Аслъан тырихыгъэх.