Чъэпыогъум и 1-р къэмысызэ…

Федеральнэ фэгъэкIотэнхэр зиIэхэу социальнэ фэIо-фашIэхэр зыфагъэцакIэхэрэм ахэр къызэрэзыIэкIагъэхьащт шIыкIэр чъэпыогъум и 1-р къэмысызэ къыхахын фае.

Законым къызэрэщыдэлъытагъэмкIэ, социальнэ фэIо-фашIэхэр къызтефэхэрэм зэкIэ зэхэубытагъэу афагъэцэкIэнхэу къыхахын фитых, ахэм ачIыпIэкIэ ахъщэ къаратынэу агъэп­сын амали яI. ФэIо-фашIэхэр къызтефэхэрэм ащыщых сэкъатныгъэ зиIэхэр, зэо зэпэуцужьхэм яветеранхэр, радиацием иягъэ зэригъэкIыгъэхэр, нэмыкIхэри.

Социальнэ фэIо-фашIэхэм ауасэр непэ сомэ 1121-рэ чапыч 42-рэ мэхъу. Ащ щыщэу сомэ 863-рэ чапыч 75-р Iэзэгъу уцхэм, соми 133-рэ чапыч 62-р IэзэпIэ-гъэпсэфыпIэ путевкэм апай, соми 124-рэ чапычи 5-р санаторием зэрэкIощт мэшIокугъогу е нэмыкIэу къалэхэр зэзыпхырэ транспортым пае къыщыдэлъытагъ.

ЦIыфэу социальнэ фэIо-фашIэхэр ыгъэфедэнхэу фитыныгъэ зиIэм ежь зыфаер на­хьыпэкIэ къыхихыгъагъэу ыкIи зыпари зэблихъужьынэу гухэлъ имыIэмэ, ПенсиехэмкIэ фондым зыфигъэзэн ищыкIагъэп. Ау зыфаер ыгъэунэфын фаеу щытмэ е зэхъокIыныгъэ горэ фишIы шIоигъомэ, лъэIу тхылъыр чъэпыогъу мазэм и 1-р къэмысызэ ытын фае. Ащ пае ПенсиехэмкIэ фондым е МФЦ-м екIуалIэми хъущт, электроннэ шIыкIэр ыгъэфедэнышъ, «унэе кабинетымкIэ» тхылъыр ытыни ылъэкIыщт.

Социальнэ фэIо-фашIэхэр къызэрэзыIэкIигъэхьащт шIыкIэр илъэс къэс цIыфым зэблихъунэу законым фитыныгъэ къеты.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу