ЦIыфыбэ зыщызэблэкIырэ чIыпIэхэм…

Урысыем и Къэралыгъо Думэ псауныгъэр къэухъумэгъэнымкIэ и Комитет ипащэу Д. Морозовым къызэриIорэмкIэ, цIыфыбэ зыщызэблэкIырэ чIыпIэхэм охътэ благъэхэм автоматическэ дефибрилляторхэр ащагъэуцунхэ алъэкIыщт.

ОшIэ-дэмышIэу гур къызэрэуцугъэм къы­хэкIэу дунаим ехыжьхэ­рэм япчъагъэ нахь ма­кIэ шIыгъэным пае Удмуртием и Къэралыгъо Совет ащ фэгъэхьыгъэ хэбзэгъэуцугъэм кIэщакIо фэ­хъугъ. Урысыем ипарламентариехэр ащ ды­рагъэштэным фэхьазырхэу еIо Д. Мо­розовым.

Портативнэ дефибрилляторхэр Урысыем къыщыдагъэкIых. Зигугъу мыщ дэжьым ашIырэр «автоматические наружные дефибрилляторы» зыфаIохэрэр ары. Апэрэ медицинэ IэпыIэгъу цIыфым зэребгъэгъотын плъэкIыщтым щыгъуазэ пэпчъ ахэр ыгъэфедэнхэ, зыгу ошIэ-дэмышIэу къэуцугъэм апэрэ IэпыIэгъу псынкIэр ахэмкIэ ригъэгъотын ылъэкIыщт.

Ащ фэгъэхьыгъэ хэбзэгъэуцугъэ штэгъэным икIэща­кIохэм къызэрэхагъэщырэмкIэ, цIыфым ыбгъэгу а де­фибрилляторыр зынэскIэ, приборым ежь-ежьырэу «къе­шIэ» токым иразряд ащ егъэогъэн фаеми, ар имыщыкIагъэми. ЦIыфым ыгу Iоф къегъэшIэжьыгъэным фэшI ар ищыкIагъэ хъумэ, приборым а разрядыр къеты.
Гур къызыуцурэм цIыфым ищыIэныгъэкIэ анахь мэхьанэшхо зиIэр уахътэр арышъ, нахьыбэрэмкIи ар (уахътэр) щыIэрэпышъ, врачым иIэпыIэгъу ежэн зымылъэкIырэри макIэпышъ, ахэм афэдэ приборхэу цIыфыбэ зыщызэблэкIырэ чIыпIэхэм ащыбгъотынхэ плъэкIыщтхэм яшIогъэшхо къэкIонэу къытшIошIы.