ЦIыфхэм яшIуагъэ арагъэкIыщт

Урысые Федерацием и Президент ипшъэрылъкIэ Адыгэ Республикэм и ЛIышъхьэу КъумпIыл Мурат тыгъуасэ цIыфхэр ригъэблэгъагъэх.

Ащ къыдыхэлъытагъэу гумэкIыгъо зиIэу зыкъыфэзыгъэзэгъэ нэбгыритфымэ яIофыгъохэр мы мафэм зэшIохыгъэхэ хъугъэ. Iофтхьабзэм хэлэжьагъэх федеральнэ инспектор шъхьаIэу Сер­гей Дрокиныр, АР-м и ЛIышъхьэрэ министрэхэм я Кабинетрэ я Администрацие ипащэу ТхьакIущынэ Мурат, республикэм ипрокурор ипшъэ­рылъхэр зыгъэцэкIэрэ Алексей Козачек.

Мыекъопэ районым ит поселкэу Каменномостскэм иура­мэу Гагариным ыцIэ зыхьырэм иавтомобиль гъогу гъэкIэжьыгъэнымкIэ IэпыIэгъу ящыкIагъэу мыщ щыпсэухэрэм пащэхэм закъыфагъэзагъ. Ахэм ялIыкIо къызэриIуагъэмкIэ, урамым социальнэ мэхьанэ зиIэ псэолъабэ тет, ау гъогум изытет уигъэрэзэнэу зэрэщымытым цIыфхэм гумэкIыгъуабэ къафехьы.

АР-м и ЛIышъхьэ къызэрэхигъэщыгъэмкIэ, подпрограммэу «Къоджэ псэупIэхэм зыпкъ итэу хэхъоныгъэр ашIыныр» зыфиIорэм къыдыхэлъытагъэу Мыекъуапэ икIэу Гъозэрыплъэ екIолIэрэ автомобиль гъогум гъэцэкIэжьынхэр рашIылIэщтых. Ащ хэхьащт ыпшъэкIэ зигугъу къэтшIыгъэ урамым пхырыкIырэ гъогури, ащ икIыхьагъэ километри 2,2-рэ мэхъу. 2019-рэ илъэ­сым шэкIогъу мазэм ехъулIэу объектым изэтегъэпсыхьан аухынэу агъэнафэ.

Тэхъутэмыкъое районым ипоселкэу Яблоновскэм иура­-мэу ЧибийскэкIэ заджэхэрэм тет фэтэрыбэу зэхэт унэм иин­женернэ сетьхэм игъэкIотыгъэ гъэцэкIэжьынхэр яшIылIэгъэнхэмкIэ яшIуагъэ къарагъэкIынэу АР-м и ЛIышъхьэ цIыфхэм зыкъыфагъэзагъ. ТСЖ-у «Чибис» зыфиIорэм итхьаматэ республикэм ипащэ зэрэщигъэ­гъозагъэмкIэ, унэм щыпсэухэ­рэм япшъэрылъхэр зэрифэшъуа­шэу агъэцакIэх, фэтэрыбэу зэхэт унэхэм игъэкIотыгъэ гъэ­цэкIэжьынхэр яшIылIэгъэнхэм пэIухьащт ахъщэр процент 98-м кIахьэу цIыфхэм къаугъои, коммунальнэ фэIо-фашIэхэм алъэныкъокIэ чIыфэ ателъэп. Ежьхэм амалэу яIэм елъытыгъэу унэм ищыкIэгъэ гъэцэ­кIэжьын мыинхэр рашIылIэх. Ау мылъкушхо зыпэIухьащт инженернэ сетьхэм ягъэкIэжьынкIи, нэмыкI лъэныкъохэмкIи IэпыIэгъу ящыкIагъ.

Профильнэ министерствэм ипащэ иапэрэ гуадзэу Лафышъ Рэмэзан къызэриIуагъэмкIэ, охътэ кIэкIым телъытэгъэ рес­публикэ программэм игъэцэкIэн къыдыхэлъытагъэу къихьащт илъэсым мы унэр зэтырагъэ­псыхьащт. ИгъэкIотыгъэ гъэцэкIэжьынхэм зэкIэмкIи сомэ миллиони 6,2-рэ фэдиз апэIухьащтэу къалъытагъ, ащ щыщэу миллион 1,6-р инженернэ сетьхэм ягъэкIэжьын тефэщт.

— Яблоновскэм хэхъоныгъэхэр ышIынхэр, мыщ дэсхэм щыIэкIэ-псэукIэ амалэу яIэхэр нахьышIу хъуным мэхьанэшхо етэты. Мы лъэныкъомкIэ аужырэ уахътэм зэшIотхыгъэри макIэп, гъогухэр тэшIых, тэгъэцэкIэжьых, социальнэ псэолъакIэхэр къызэIутэхых, псэупIэм иинфраструктурэ шэпхъэшIухэм адиштэу гъэ­псыгъэным тыпылъ. Мы IофшIэныр тапэкIи лъыдгъэкIотэн гухэлъ тиI.

Поселкэм зэхъокIыны­гъэшIоу фэхъухэрэр цIыфхэм зэхашIэныр ары пстэуми анахь шъхьа­Iэр, — къыIуагъ КъумпIыл Мурат.

Поселкэу Инэм кIэлэцIыкIу IыгъыпIэ щышIыгъэным иIофыгъо ыгъэгумэкIэу мы псэупIэм дэс бзылъфыгъэр республикэм ипащэ къеолIагъ. КъызэраIуагъэмкIэ, программэу «Гъэсэныгъэм хэхъоныгъэ ышIыныр» зыфиIоу 2014 — 2025-рэ илъэсхэм ателъытагъэм къыдыхэлъыта­гъэу чIыпIэ 240-рэ зиIэщт кIэлэцIыкIу IыгъыпIэ Инэм щашIыщт. Проектым сомэ миллиони 150-рэ тефэщт, къихьащт илъэсым ащ игъэцэкIэн фежьэщтых.

Компьютернэ томографрэ рентген аппаратрэ селоу Красногвардейскэм дэт район сы­мэджэщым чIэгъэуцогъэнхэмкIэ IэпыIэгъу ящыкIагъэу мы псэупIэм къикIыгъэ бзылъфыгъэм пащэхэм закъыфигъэзагъ. Министрэу Мэрэтыкъо Рустем къы­зэриIуагъэмкIэ, мы Iофы­гъом изэшIохын пэIухьащт сомэ миллиони 10-р республикэ бюджетым къыхагъэкIыгъ, учреждением ищыкIэгъэ оборудованиер IэкIэхьагъ. 2019-рэ илъэсым имэзае ехъулIэу ахэр агъэуцущтых.

Шэуджэн районым ипоселкэу Заревэм дэт культурэм и Унэ гъэцэкIэжьынхэр ешIылIэгъэнхэм иIофыгъуи цIыфхэм къаIэтыгъ. АР-м культурэмкIэ иминистрэ игуадзэу ШъэуапцIэкъо Аминэт къызэриIуагъэмкIэ, лъэпкъ проектэу «Культура» зыфиIорэм мы псэуалъэр хагъэхьагъ. Ащ къыдыхэлъытагъэу гъэцэкIэжьынхэм апэIухьащт сомэ миллион 22-м ехъу учреждением фатIупщыщт.

УФ-м и Президент ипшъэ­рылъкIэ цIыфхэр зэрэрагъэблэгъагъэхэм дакIоу гумэкIыгъо зиIэ нэбгырэ заулэмэ ежь ашъхьэкIэ АР-м и ЛIышъхьэ зыфагъэзагъ. Ахэм яIофыгъохэми республикэм ипащэ ахэп­лъагъ, яшIуагъэ арагъэкIынымкIэ ведомствэхэм япащэхэм пшъэ­рылъ гъэнэфагъэхэр афи­шIы­гъэх.

ТХЬАРКЪОХЪО Адам.