Цышэ Муртаз тегъэгугъэ

Къыблэм ыкIи Темыр Кавказым якIэлэ-еджакIохэм гимнастикэмкIэ язэнэкъокъу Ростов-на-Дону щыкIуагъ. Мыекъуапэ испорт еджапIэу N 2-м зыщызыгъасэхэрэм зэIукIэгъухэм медальхэр къащыдахыгъэх.

Спорт псэуалъэу «конь-мах» зыфиIорэм яIэпэIэсэныгъэ къызыщагъэлъагъом, Адыгэ республикэ гимназием щеджэрэ Цышэ Муртаз дышъэ медалыр къыфагъэшъошагъ. Пкъэум тетэу, гимнастикэм хэхьэрэ зэхэт зэнэкъокъумкIи М. Цышэм джэрз медалищ къыдихыгъ — зэкIэмкIи медали 4 къыхьыгъ. Спортсмен цIэрыIо хъунэу Цышэ Муртаз тегъэгугъэ.

Шъхьафит шIыкIэхэм якъэгъэлъэгъон фэгъэхьыгъэ зэIукIэгъум Тимур Курдаллян тыжьын медалыр къыщихьыгъ. Даниил Широковым «конь-мах» зыфиIорэм ящэнэрэ чIыпIэр къыщыдихыгъ.

Тренер-кIэлэегъаджэхэу Косных Вячеславрэ Людмила Поповамрэ тиспортсменхэр агъасэх. КIэлэеджакIохэм Урысыем изэнэкъокъу зыфагъэхьазыры.

Сурэтым итыр: Цышэ Муртаз иIэпэIэсэныгъэ къегъэлъагъо.

ЕМТIЫЛЪ Нурбый