ХэбзэухъумакIохэм къаты

ГъэпцIакIохэм шъуафэсакъ

Мы аужырэ уахътэм интернет зэпхыныгъэм иамалкIэ цIыфэу агъапцIэхэрэм япчъагъэ хэпшIыкIэу хэхъуагъ.

ГущыIэм пае, товархэр ащэ­хэу ыкIи ащэфхэу сайтхэм мэкъэгъэIухэр къарагъахьэх. Товарыр зыщэфы зышIоигъохэм якартэ номерхэр гъэпцIагъэкIэ бзэджашIэхэм къызIэкIагъахьэх, нэужым якартэ ахъщэу илъыр зэкIэ рахы.

Банкым къышъуитыгъэ картэм иномер яшъу­Iон фаеу зыгорэкIэ СМС-мэкъэгъэIу къы­шъуIукIэмэ е телефонымкIэ къышъуфытео­хэмэ, шъушIошъ шъумыгъэхъу, гъэпцIакIохэм зя­шъумыгъэгъэдел, цыхьэ афэшъумышI. КартэмкIэ ыкIи терминалымкIэ шъуифэIо-фашIэхэр жъугъэцакIэхэ хъумэ сакъыныгъэ къызхэ­жъу­гъаф.

Шъуикартэ и ПИН-код ыкIи цифрэ 16 хъурэ номерыр яшъуIон фаеу СМС къышъу­IукIэмэ е телефонымкIэ къы­шъуфытеохэмэ яшъумыIу, бзэджашIэхэм зяшъумыгъэгъапцI.

Агъэгъозагъэх

ЦIыфхэр зыщырагъэблэгъэхэрэ мафэхэм Мыекъуапэ и Къэралыгъо автоинспекцие ушэтынхэр зыщаригъэкIурэ межрегистрационнэ отделым щыжъот.

ЦIыфхэр щынэгъончъэу автомобилымкIэ къыращэкIынхэмкIэ гумэкIыгъохэу щыIэхэм водительхэм анаIэ атырарагъэ­дзэным фэшI Къэралыгъо автоинспекцием игъэIорышIапIэ кIэщакIо фэхъуи, ыпшъэкIэ зигугъу къэтшIыгъэ отделым къе­кIолIагъэхэм профилактическэ зэдэгущыIэгъухэр адашIыгъэх.

Iофтхьабзэм дакIоу «Шъо шъухэмытэу хъущтэп!» зыфиIорэ Урысые кампаниер зэрэрагъэ­жьагъэр полицейскэхэм къаIотагъ. Джащ фэдэу кIэлэцIыкIу­хэр щынэгъончъэу автомобилымкIэ къыращэкIынхэмкIэ хэушъхьафыкIыгъэхэ пкъыгъохэр машинэхэм зэрарытынхэ фаехэр агу къагъэкIыжьыгъ. Ащ фэдэ пкъы­гъохэр шапхъэм диштэу ащэфынхэм фэшI къэбарэу апылъхэр къафаIотагъэх. Нахь игъэ­кIотыгъэу мыщ щыгъэ­гъо­зэгъэн­хэм фэшI кIэлэцIыкIухэр щынэгъончъэу къызэрепщэкIыщтхэр къизыIотыкIырэ видеом рагъэплъыгъэх.

Iофтхьабзэм икIэухым полицием икъулыкъушIэхэм джыри зэ цIыфхэм зафагъэзагъ са­къыныгъэ къызхагъэфэнэу ыкIи гъогурыкIоным ишапхъэхэр амыукъонхэу.

Шапхъэхэр зэрагъашIэх

Сабыим Iэдэб хэлъэу, щынэгъончъэу гъогум щызекIоным ицIыкIугъом щыублагъэу фэбгъэсэн фае. Ар яIэубытыпIэу Адыгеим и Къэралыгъо автоинспекцие икъулы­къушIэхэм кIэлэцIыкIухэм апае ренэу пэшIорыгъэшъ Iофтхьабзэхэр зэхещэх.

Джырэблагъэ ГИБДД-м икъу­лыкъу­шIэхэр автокъэлэ цIыкIум иIофышIэхэр ягъу­сэхэу кIэлэцIыкIу Iыгъы­пIэмэ ачIэсхэ кIэлэ­цIы­кIухэм аIукIагъэх, къыт­кIэхъу­хьэхэрэ лIэужхэр щынэгъон­чъэу гъогум щызекIонхэмкIэ джэгукIэ шъуа­шэм илъэу гъогурыкIоным ишапхъэхэр къафаIотагъэх.

Джащ фэдэу къулыкъушIэхэм анаIэ зытырагъэтыгъэхэм ащыщ кIэлэцIыкIухэр маши­нэмкIэ къы­ращэкIыхэ хъумэ ахэр къэзыу­хъумэхэрэ хэушъхьафыкIыгъэ тIысыпIэхэм арысынхэ ыкIи бгырыпхымкIэ арыпхыхьэгъэнхэ зэрэфаехэм. Инспекторхэм нэрылъэгъу IэпыIэгъухэр къызфагъэфедэхэзэ, нэфрыгъуа­зэхэм ыкIи гъогу тамыгъэхэм яшап­хъэхэр кIэлэцIыкIухэм къафаIотагъэх.

Iофтхьабзэм икIэухым гъогум щынэгъончъэу ущызекIоным уфэзыгъасэхэрэ гъогу тамыгъэ­хэр зытетхэ джэгуалъэхэр шIухьафтынэу кIэлэцIыкIухэм аратыгъэх.

Сакъыныгъэм фэIорышIэх

Гъогухэм щынэгъончъэу ащызекIонхэм фэшI Кощхьэблэ районым и Къэралыгъо автоинспекторхэм лъэныкъо зэфэшъхьафхэмкIэ цIыфхэм яфэIо-фашIэхэр зыщагъэцакIэрэ Гупчэм иIофышIэхэм пэшIорыгъэшъ Iофтхьабзэхэр адызэрахьагъэх, Урысые кампаниеу «Шъо шъухэмытэу хъущтэп!» зыфиIоу рекIокIырэм имэхьанэ къафаIотагъ.

Полицием икъулыкъушIэхэм Гупчэм иIофышIэхэм ыкIи ащ къекIолIагъэхэм зафагъэзагъ сакъыныгъэ къызхагъафэзэ автомобилыр зэрафэнэу, гъогурыкIоным ишапхъэхэр амыукъонхэу, псынкIащэу мызечъэнхэу.

Джащ фэдэу щынэгъончъэным ибгырыпх зэрагъэфедэн ыкIи хэушъхьафыкIыгъэ кIэлэцIыкIу тIысыпIэхэр автомобильхэм арытынхэ зэрэфаер агу къагъэкIыжьыгъэх. КIэлэцIыкIухэр щынэгъон­чъэу къекIокIынхэмкIэ шапхъэхэу щыIэхэр амыукъонхэу къулыкъушIэхэр водительхэм къяджэх.

ЦIыфэу рулым Iусым ежь имызакъоу, машинэм къыдисымкIи пшъэдэкIыжь ехьы. Арышъ, сакъыныгъэу хэлъыр нахь ыгъэлъэшын фае, анахьэу сабыйхэр къыдисыхэ хъумэ. Гъогур щынэгъончъэу щытыныр водительхэм япшъэрылъ.

Водитель ешъуагъэхэр къаубытых

Ешъуагъэхэу автомобилыр зезыфэхэрэ водительхэр къыхэгъэщыгъэнхэм фэшI Адыгеим икъэралыгъо автоинспекторхэм пэшIорыгъэшъ Iофтхьабзэу «Нетрезвый водитель» зыфиIорэр рагъэкIокIыгъ.

Полицием иIофышIэхэм пшъэрылъэу яIагъэр ешъуагъэхэу автомобилыр зыгъэIорышIэхэрэ водительхэр къэубытыгъэнхэр, гъогурыкIоным ишапхъэхэр зыукъохэрэм пшъэдэкIыжь ягъэхьыгъэныр ары.

Iофтхьабзэм къыхагъэлэжьагъэх гъэцэкIэкIо хэбзэ къулыкъу­хэм ялIыкIохэр, къэзэкъхэр, волонтер отрядхэр.

Ахэр водительхэм къяджагъэх гъогурыкIоным ишапхъэхэр амыукъонхэу, ешъуагъэхэу рулым кIэрымытIысхьанхэу, джащ фэдэу гъогурыкIоным ишапхъэхэр къизыIотыкIыхэрэ тхьапэхэр афагощыгъэх.

Iофтхьабзэр окIофэ гъогурыкIоным ишапхъэхэр аукъуагъэхэу хъугъэ-шIэгъэ 38-рэ инспекторхэм къыхагъэщыгъ, ешъуагъэу зы водитель къаубытыгъ.

АР-м хэгъэгу кIоцI IофхэмкIэ и Министерствэ ипресс-къулыкъу.

НэкIубгъор зыгъэхьазырыгъэр КIарэ Фатим.