ХЬАТЫУ Джамболэт: «ХэтэрыкIлэжьынымкIэ Адыгеим амалышхохэр иIэх»

Адыгэ Республикэм и ЛIышъхьэ ипшъэрылъхэр пIэлъэ гъэнэфагъэкIэ зыгъэцэкIэрэ КъумпIыл Муратрэ Урысые Федерацием мэкъу-мэщымкIэ иминистрэ иапэрэ гуадзэу Хьатыу Джамболэтрэ Адыгеим лэжьыгъэр зэрэщыIуахыжьырэм, мэкъу-мэщым Iофхэр зэрэщызэпыфэхэрэм, ащ хэхъоныгъэ егъэшIыгъэнымкIэ амалэу щыIэхэм атегущыIагъэх.

КъумпIыл Мурат къызэриIуагъэмкIэ, гектар мин 11-м ехъу зэлъызыубытыщтыгъэ бжыхьэ хьэр аIожьыгъах. ЧIыгулэжьхэр бжыхьэ коцым иIухыжьын фежьагъэх, пстэумкIи гектар мин 75,5-рэ фэдиз ащ зэлъеубыты. Кощхьэблэ,

Красногвардейскэ районхэм ячIыгулэжьхэр ары нахьыбэу коцыр къэзыхьы жьыхэрэр. Ахэм гектар пэпчъ центнер 55-рэ фэдиз къырагъэты.

Республикэм ипащэ зэрэхигъэунэфыкIыгъэмкIэ, къэралыгъо программэхэм адиштэу республикэм непэкIэ анахьэу ынаIэ зыщытырагъэтырэр унэгъо былымэхъо фермэхэм зягъэушъомбгъугъэныр ары. IофшIэпIэ чIыпIакIэхэр щыIэ зэрэхъущтым дакIоу лыри, щэри нахьыбэу джащыгъум къахьыжьыщт.

НепэкIэ чIыгулэжьыным зэхъокIыныгъэхэр фэхъугъэх. Лэжьыгъэр къызэрахьыжьырэм нэмыкIэу пхъэшъхьэ-мышъхьэхэр псынкIэу къызыпыкIэрэ чъыгхэр къэгъэкIыгъэнхэм, хэтэрыкIлэжьыным, пынджшIэным апыхьагъэх. Шапсыгъэ псыIыгъыпIэмрэ псы зэрэкIагъэхъорэ Афыпсыпэ системэмрэ загъэкIэжьхэкIэ, пындж нахьыбэу алэжьы хъущт. Тэхъутэмыкъое районым ипынджшIэпIэ гектар мини 3-ми псыр акIагъэхъощт.

Республикэр федеральнэ программэ пстэуми гъэхъагъэ хэлъэу зэрахэлажьэрэр ыкIи хэтэрыкIлэжьынымкIэ Адыгеим амалышхохэр зэриIэр Хьатыу Джамболэт къыIуагъ. Урысые Федерацием мэкъу-мэщымкIэ иминистрэ иапэрэ гуадзэ зэрэхигъэунэфыкIыгъэмкIэ, республикэм нахь зигъэчанмэ, экологическэу къэбзэ гъомылапхъэхэу ящыкIагъэм фэдиз Урысыем ибэдзэрхэм аIэкIигъэхьан ылъэкIыщт.

Адыгэ Республикэм и ЛIышъхьэ ипресс-къулыкъу

Сурэтыр А. Гусевым тырихыгъ.