Хъулъфыгъэм ифитыныгъэхэр къыухъумагъэх

Мыекъуапэ щыпсэурэ хъулъфыгъэм ифитыныгъэхэм якъэухъумэн епхыгъэ Iофым Адыгэ Республикэм и Апшъэрэ хьыкум граждан IофхэмкIэ иколлегие хэплъагъ.

Республикэ учреждением Iоф щызышIэрэ хъулъфыгъэм псэупIэ зэригъэгъотыным е ышIыным фэшI зэтыгъо ахъщэ тыныр къыратынымкIэ учетым зэрэхамыгъэуцуагъэр хабзэм димыштэу ылъыти, ащ итхьаматэ едаоу хьыкумым иапэрэ инстанцие зыфигъэзагъ. Хъулъфыгъэм къызэриIуагъэмкIэ, илъэс 12-м ехъугъэу мы организацием Iоф щешIэ, ащ къыхэкIэу фэгъэкIотэныгъэ къыратынымкIэ фитыныгъэ иI. Арэу щытми, фэгъэкIотэныгъэм зыщыкIэдэурэ тхылъыр тхьаматэм къызэкIигъэкIожьыгъ. Организацием итхьаматэ зэрилъытэрэмкIэ, зэкIэ ищыкIэгъэ тхылъхэр даорэм икъоу къыIэкIимыгъэхьагъэхэу ары.

Хьыкумым иапэрэ инстанцие Iофым зыхэплъэм, даорэм дыригъэштагъ ыкIи фэгъэкIотэныгъэ къыратынымкIэ хъулъфыгъэр учетым хагъэуцонэу пащэм унашъо фишIыгъ. Ау пащэр а унашъом емызэгъэу, АР-м и Апшъэрэ хьыкум апелляционнэ даокIэ зыфигъэзагъ.

 АР-м и Апшъэрэ хьыкум граждан IофхэмкIэ иколлегие Iофым зыхэплъэм ыгъэунэфыгъ хъулъфыгъэм IофшIэнымкIэ истаж илъэс 12-м зэрехъугъэр. Ащ къыхэкIэу Федеральнэ законым къызэригъэнафэрэмкIэ, фэгъэкIотэныгъэ къыратынымкIэ хъулъфыгъэм фитыныгъэ иI. Ар иIэубытыпIэу социальнэ тыныр къыратыным фэшI ищыкIэгъэ тхылъхэр зэкIэ хъулъфыгъэм ыгъэпсыгъэх, ау псэупIэр ишъхьэгъусэ тетхагъэ фэдэу ушъхьагъу ашIи, ахэр къызэкIагъэкIожьыгъ.

Къэралыгъо реестрэ зыкIым къызэригъэнафэрэмкIэ, хъулъфыгъэм документхэр зыщитыгъэ уахътэм тефэу ащ ишъхьэгъусэ псэуалъэр тетхагъэу щытыгъэп ыкIи ар къэзыушыхьатырэ тхылъыр хъулъфыгъэр зыIут IофшIапIэм IэкIигъэхьагъ. Ащ ыпкъ къикIыкIэ, псэупIэ комиссием хъулъфыгъэм дыримыгъэштэн ыкIи ипсэупIэ амалхэр нахьышIу шIыгъэнымкIэ учетым химыгъэуцон фитыгъэп.

Адыгэ Республикэм и Апшъэрэ хьыкум граждан IофхэмкIэ иколлегие зэхэгущыIэжьи, район хьыкумым иунашъо къыгъэнэжьыгъ, хъулъфыгъэр зыIут IофшIапIэм ипсэупIэ комиссие идао фызэкIигъэкIожьыгъ.

АР-м и Апшъэрэ хьыкум ипресс-секретарэу

ХЬАУДЭКЪО Азэмат.