ФэгъэкIотэн процент 50-р бэмэ къызфагъэфедагъ

Административнэ хэбзэукъоныгъэхэм я Кодекс зэхъокIыныгъэу фашIыгъэхэм къызэрагъэнафэу, гъогурыкIоным ишапхъэхэр зыукъогъэ водительхэм атыралъхьэгъэ тазырым ызыныкъо апщыныжьын амал зэряIэм фэгъэхьыгъэ унашъор зызекIорэр илъэситIу хъущт нахь мышIэми, пстэуми ар къызфагъэфедэу пIон плъэкIыщтэп.

Джыри зэ ащ фэгъэхьыгъэ къэбарыр шъугу къэдгъэкIыжьын. Хэбзэгъэуцугъэм къызэрэдилъытэрэмкIэ, тазырыр къызщыптыралъхьагъэм къыщыублагъэу мэфэ 20-м къыкIоцI ар зыптыжькIэ, ащ ызыныкъо къыпфагъэгъу.

ГущыIэм пае, административнэ тазырэу сомэ 1000 къыптефагъэмэ, мэфэ 20-м къыкIоцI ар зыбгъэгъужькIэ, птырэр сомэ 500.

Мы фэгъэкIотэныр Адыгеим гъэцэкIагъэ зэрэщыхъурэм, тазырыр нахь псынкIэу къатыжьынымкIэ а амалыр водительхэм агъэфедэмэ тыкIэупчIагъ. Мы аужырэ уахътэхэм тазырхэм яугъоижьын хэхъуагъ нахь мышIэми, проценти 100-м нэсырэп. Игъом ыкIи икъоу административнэ пшъэдэкIыжьхэр апщыныжьынхэм фэIорышIэнэу фэгъэкIотэн процент 50-р къырагъэжьагъ.

Къэралыгъо автоинспекцием и ГъэIорышIапIэу АР-м щыIэм ипресс-къулыкъу къызэритыгъэмкIэ, зигугъу тшIырэ хэбзэгъэуцугъакIэм ишIуагъэ къэмыкIоу пIон плъэкIыщтэп. ГъогурыкIоныр щынэгъончъэнымкIэ къулыкъум зэрэщалъытэрэр — анахь шъхьаIэр ахъщэр къаугъоиныр арэп, цIыфым ышIэгъэ хэукъоныгъэр зыдишIэжьыныр ары. Атыралъхьэгъэ тазырым ахъщалъэр ыунэкIыныр арэп, язекIуакIэ нахь тэрэз хъуным фэIорышIэнэу щыт.

Мы илъэсым имэзи 10 къыкIоцI тиреспубликэ административнэ пшъэдэкIыжь зэратыралъхьагъэмкIэ постановление 262102-у сомэ миллиони 197-рэ мин 302-рэ ауасэ щатхыгъ. Ащ щыщэу фэгъэкIотэн шIыкIэкIэ атыжьыгъэр сомэ миллион 49-рэ мин 488-рэ.

Сыдэущтэу мы Iофыр рекIокIыра?

Тазырыр зэрапщыныгъэ къэбарыр банкхэм ыкIи чIыфэ зытырэ нэмыкI организациехэм, почтэм чэщ-зымафэм къыкIоцI къэралыгъо ыкIи муниципальнэ тынхэм афэгъэхьыгъэ къэбарлъыгъэIэс системэм (ГИС ГМП ыужкIэ къызэрэщытIощтыр) рагъэхьан фае. Нэужым къэбарыр ащ къекIышъ, гъогурыкIоныр щынэгъончъэнымкIэ къулыкъум икомпьютернэ базэу «Административная практика» зыфиIорэм къехьэ.

2016-рэ илъэсым щылэ мазэм и 1-м къыщегъэжьагъэу шапхъэр зыукъуагъэу инспекторхэм къыхагъэщыхэрэм е видеокамерэм къыридзэхэрэм тазырыр зэрэщытэу итхагъэу тхьапэ къараты. Ащ къыщеIо мэфэ 20-м къыкIоцI ахъщэм ызыныкъо ытыжьын амал зэриIэр. Нэужым мы цIыфым тыралъхьэгъэ тазырым ызыныкъо зэритыжьын ылъэкIыщт къэбарыр ГИС ГМП-м лъагъэIэсын фае. Джащ фэдэу я 21-рэ мафэм а къэбар системэм пIалъэр зэрикIыгъэр рагъэхьажьы.

Мэфэ 20 пIалъэ зыкIыпылъыр тазырэу къытыралъхьагъэм водителыр емызэгъы зыхъукIэ, мэфи 10-м къыкIоцI кIэдэон амал иIэнэу ары.

ШъунаIэ тешъудз!

Тазырыр птынэу узыкIокIэ, квитанцием иптхэн фэе пчъэгъэ 20-у зэхэтыр (уникальный идентификатор начисления — УИН) тэрэзэу иптхэн фае. ПлъэкъуацIи, къызыщыратхыкIыгъэ мафэми, банкым тыригъэхъорэ комиссиеми уахэукъо хъущтэп. Зы хэукъоныгъэ зыхэпшIыхьэрэм, къэбарлъыгъэIэс системэм уитазыр ихьащтэп, чIыфэ зытелъхэм уакъыхэнэщт.

ЯтIонэрэу а хэукъоныгъэ дэдэр илъэсым къыкIоцI зышIырэ водительхэми (ыпэрэ тазырыр игъом атыжьыгъ нахь мышIэми) ащ фэдэ амал яIэжьырэп. Шъугу къэдгъэкIыжьын, ятIонэрэу мы хэбзэгъэуцугъэр зыукъохэрэм пшъэдэкIыжь тедзэхэри арагъэхьы. ГущыIэм пае, ячъэ зы сыхьатым телъытагъэу километрэ 40 — 60-рэ, 60 — 80-рэ ыкIи 80-м къезыгъэхъухэрэм, ягъогу текIыгъэхэм, нэфрыгъозэ плъыжьым зэпырыкIыхэрэм.

ГъогурыкIоным хэлажьэхэрэм Къэралыгъо автоинспекцием агу къегъэкIыжьы — джырэ уахътэм административнэ пшъэдэкIыжьхэм япхыгъэ хэбзэгъэуцугъэм къызэрэщиIорэмкIэ, цIыфым ежь-ежьырэу мэфэ 60-м къыкIоцI ахэр ыгъэгъужьынхэ ылъэкIыщт. А уахътэр зыблэкIыкIэ, тазырыр фэдитIукIэ уагъэпщыны ыкIи административнэ хьапс мэфэ 15 къыптыралъхьэ е сыхьат 50-м телъытэгъэ шIокI зимыIэ IофшIэнхэр уагъэгъэцэкIэщтых.

Водителым ымытыжьыгъэу тазырхэмкIэ чIыфэ телъымэ ыуплъэкIун ылъэкIыщт. Ащ пае къэралыгъо фэIо-фашIэхэм я ЗыкI портал (www.gosuslugi.ru) е Къэралыгъо автоинспекцием иофициальнэ сайт ар ихьанышъ, еплъыщт.

ЗыгорэкIэ игъом тазырыр зэратыжьыгъэм икъэбар зырамыгъуатэкIэ, ар зыщызэшIуахыгъэ чIыпIэм кIонхэшъ, щыкIэупчIэнхэ фае.

IЭШЪЫНЭ Сусан.