Финалныкъор рагъэжьэщт

«Лидеры России» зы­фиIорэ зэнэкъокъум Къыблэ федеральнэ шъолъырымкIэ ифиналныкъо непэ къыщыублагъэу мэзаем и 11-м нэс Ростов-на-Дону щыкIощт.

Заочнэ шIыкIэмкIэ зэфэхьысыжь дэгъухэр къэзыгъэлъэгъуагъэхэр федеральнэ шъолъыр­хэм ащыкIощт финалныкъохэм ахэлэжьэщтых. «Лидеры России» зыфиIорэ Iофтхьабзэм иапэрэ уцугъохэм яшIэныгъэ къыщызыгъэлъэгъуагъэхэм непэ джыри зэ компьютерымкIэ тес­тирование акIущт. Ащ щыпхырыкIыщтхэр зэнэкъокъум ифиналныкъо ихьащтых. Нэ­ужым, неущрэ неущмыкIэрэ, гъэIорышIэным ылъэныкъокIэ амалэу аIэкIэлъхэмкIэ зэнэ­къокъум хэлажьэхэрэм заушэтыщт.

Неущ сыхьатыр 10-м Iофтхьабзэр мэфэкI шIыкIэм тетэу къызэ­Iуахыщт. Мэзаем и 9-м ыкIи и 10-м щыIэщт гъэцэкIэнхэм зэфэхьысыжьэу афэхъущтхэр и 11-м къэнэфэщтых. Зэ­нэкъокъум хэлажьэ­хэ­рэр куп-купэу гощы­гъэхэу зыдэлэжьэщтхэ Iофтхьабзэхэр, мас­тер-классхэр афызэха­щэщтхэу зэхэщакIохэм агъэнафэ.

Мыгъэ зэнэкъокъур ятIонэрэу макIо. Блэ­кIыгъэ илъэсым егъэ­пша­­гъэмэ, зэхъокIыныгъэ гъэнэфагъэхэр фа­шIыгъэх. Ау мурадэу Iофтхьабзэм иIэр зы — ышIэрэм къыщымыуцоу, ыпэкIэ гъэхъа­гъэ­хэр зышIын гухэлъ зи­Iэ­хэм къэралыгъом ишIуа­гъэ аригъэкIыныр ары.

БлэкIыгъэ илъэсым егъэпшагъэмэ, мыгъэ финалныкъом ихьагъэ­хэм япчъагъэ нахьыбэ хъугъэ. Мы илъэсым ахэр нэбгырэ 334-рэ мэхъух, IэкIыбым къи­кIыгъэ нэбгыри 6 ахэт. Ахэм Къыблэ федеральнэ шъолъырым зыкъыщагъэлъэгъуагъ. Зэнэ­къо­къум ифиналныкъо Адыгеим илIыкIуи 4 хэфагъ.

Гъонэжьыкъо Сэтэнай.