ФедэкъэкIуапI

Адыгэ Республикэм и ЛIышъхьэу КъумпIыл Мурат тыгъуасэ IофшIэгъу дэкIыгъоу иIагъэм къыдыхэлъытагъэу Iахьзэхэлъ обществэу «Дондуковскэ элеваторым» ихэушъхьафыкIыгъэ къутамэу — былым пIашъэхэм яхъун фэгъэзэгъэ чIыпIэу Мыекъопэ районым истаницэу Кужорскэм дэтым щыIагъ.

Предприятием игенеральнэ пащэу Болэкъо Мыхьамэт къызэриIуагъэмкIэ, сатыушI фермэм изэхэщэн фытегъэпсыхьэгъэ проектым игъэцэкIэн инвестициеу халъхьащтыр зэкIэмкIи сомэ миллион 96-м ехъу. Блэ­кIыгъэ илъэсым сомэ миллион 12 зытефэгъэ былымышъхьэ 450-рэ къащэфыгъ.

Былымхэр зыщэфыхэрэм ахъщэу агъэкIодыгъэм изы Iахь афызэкIэгъэкIожьыгъэным фытегъэпсыхьэгъэ къэралыгъо Iэ­­пыIэгъум къытырэ амалыр предприятием къызфигъэфедагъ. Гухэлъэу щыIэмкIэ бы­лымышъхьэу аIыгъыр миным кIа­гъэхьанэу ары. Ащ дакIоу фер­мэм IофшIэпIэ чIыпIи 120-м ехъу къыщызэIуахыгъ, гурыт ­лэ­жьапкIэр сомэ мин 26-рэ мэхъу.

Былымхэр щыпIыгъынхэмкIэ фермэр зэрифэшъуашэу зэтырагъэпсыхьагъ, псэолъэ зэфэшъхьафхэр къыдыхэлъытагъэх. А пстэуми республикэм ипащэ осэшIу афишIыгъ.

Мыщ фэдэ инвестиционнэ проектхэм мэхьанэшхо зэраратырэр, ахэр зыгъэцакIэхэрэм сыдигъуи къэралыгъо IэпыIэгъу зэрагъотыщтыр Адыгеим и ЛIышъхьэ хигъэунэфыкIыгъ.

— Былым пIашъэхэм япчъа­гъэ республикэм нахьыбэ щы­хъуным ыкIи былымхъуным зи­ушъомбгъуным тэркIэ мэхьа­нэшхо иI. Анахьэу тапэкIэ узщыгугъын плъэкIыщтыр щэ къэ­зытырэ былымхэм яхъун ары. Ар зэшIохыгъэ зыхъукIэ, адыгэ къуаеу къыдэдгъэкIырэм хэдгъэхъон тлъэкIыщт. Ащ дакIоу былымылэу къахьыжьырэр шъо­лъырым щызэхащэрэ ермэлыкъ­хэм занкIэу ащаIуагъэкIымэ, ар хъызмэтшIапIэмкIи, щэфа­­кIо­хэмкIи федэщт, — къыIуагъ КъумпIыл Мурат.

Предприятием хэхъоныгъэ ышIынымкIэ амалэу щыIэхэм атегущыIэхэзэ, ветеринарием ылъэныкъокIэ специалистхэр егъэджэгъэнхэм фытегъэпсыхьэ­гъэ гухэлъэу Iахьзэхэлъ об­ще­ст­вэу «Дондуковскэ ­элеваторым» ипащэхэм къахьыгъэм Адыгеим и ЛIышъхьэ дыригъэ­штагъ. Къум­пIыл Мурат иеплъы­кIэкIэ, мыр щыIэныгъэм щы­пхырыщыгъэным пае Мые­къопэ къэралыгъо технологическэ университетым ыкIи шъо­лъырым иве­теринарнэ къулыкъу амалэу аIэкIэлъхэр бгъэфе­дэнхэ фае.

ТХЬАРКЪОХЪО Адам.