Ушэтынхэм зафагъэхьазыры

УшэтынхэмкIэ ящыкIэгъэ экзаменационнэ материалхэм ащыщхэр блэкIыгъэ илъэсхэм Специальнэ зэпхыныгъэмкIэ ГъэIорышIапIэм къыщагъэхьазырыщтыгъэх. Джы мыгъэ ушэтынхэр зыщыкIощтхэ чIыпIэхэм апэрэу ахэр къащыхаутыщтых.

УшэтынхэмкIэ ящыкIэгъэ материалхэр зэкIэри экзамен тыпIэм щыхэутыгъэнхэм, а IофыкIэр уплъэкIугъэным Iофтхьабзэр афэгъэхьыгъагъ.

Ащ фэдэу шэкIогъум и 2-м Мыекъуапэ иеджэпIи 4-мэ материалхэм яхэутынкIэ уплъэкIунхэр ащыкIуагъэх. Ахэр лицейхэу NN 8-р ыкIи 19-р, гимназиеу N 5-р ыкIи гурыт еджапIэу N 2-р арых. ЕджапIэ пэпчъ аудиторие тIурытIу щагъэхьазырыгъагъ. УрысыбзэмкIэ ушэтыным къэкIорэ илъэсым еджапIэм къычIэкIыщтхэм ащыщэу нэбгырэ 40 хэлэжьагъ.

Ушэтыныр рагъэжьэнкIэ такъикъ 30 иIэу къэралыгъо экзаменационнэ комиссием хэтхэм ушэтынхэр зыщыкIощт чIыпIэм экзаменационнэ материалхэр расшифровкэ зэрэпшIыщт IункIыбзэр къаратыгъ ыкIи аудиторием экзаменым ищыкIэгъэ материалхэр зэкIэри къыщыхаутыгъэх.

ТестированиемкIэ Федеральнэ гупчэм иIункIыбзэкIэ псынкIэу материалхэр къыдагъэкIыгъэх ыкIи кIэлэеджакIохэм аратыгъэх. Ащ фэдэ екIолIакIэм ушэтынхэр щынэгъончъэу зэхэщэгъэнымкIэ ишIуагъэ къэкIощт ыкIи материалхэм нахь псынкIэу зэхэщакIохэм Iоф адашIэщт.

Материалхэм Iоф зыщадашIэрэ ЧIыпIэ гупчэм ипащэу Лариса Милосердинам къызэриIуагъэмкIэ, хэутын Iофыр къагъэпсынкIагъ принтер ыкIи сканер зэтегъэпсыхьагъэхэм. Ахэр республикэм къыщэфыгъэх гъэсэныгъэм фэгъэхьыгъэ Федеральнэ целевой программэм къыдилъытэрэ ахъщэмкIэ.

СИХЪУ Гощнагъу.