«Урысыер, зипхыхь!»

Джа цIэр зиIэ социальнэ Iофтхьабзэ зэрэ Урысыеу щэкIо. Ащ имэхьаныр автомобилым зитIысхьэхэкIэ щынэгъончъэным ибгырыпх агъэфедэныр зыщамыгъэгъупшэныр ары.

Зипсауныгъэ амалхэр зэщыкъогъэ цIыфхэм автомобилым зырапхыхьаным къыфэджагъ Адыгэ Республикэм IофшIэнымкIэ ыкIи социальнэ хэхъоныгъэмкIэ иминистрэу Мырзэ Джанбэч.

Мыщ фэдэ купым хэхьэрэ цIыфхэри адрэхэм афэдэхэу гъогурыкIоным хэлажьэх ыкIи Iофтхьабзэм изэхэщакIохэм ахэм шапхъэхэр зэрагъэцэкIэнхэ фаем анаIэ тырарагъэдзагъ. Анахьэу къыхагъэщыгъэр щынэгъончъэным ибгырыпх зытыралъхьанэу зэрэщытыр ары. ОшIэ-дэмышIэу машинэр къызызэтеуцокIэ, цIыфэу ащ исыр а бгырыпхым пытэу еIыгъы, зыми емыутэкIынымкIэ амалышIу.

Мыщ фэдэ Iофтхьабзэхэм яшIуагъэ къэкIоным зэхэщакIохэр щэгугъых.